МАН-ын засаглалын эрин үед төсвийн хулгай төгсөрч байна. Өндөг шидүүлж, гурил цацуулж Баянгол дүүргийг засаглах эрхтэй болж байсан МАН-ынхан та бидний төлсөн татварын мөнгөөр ёстой тоглож өгчээ. БГД-ийн удирдлагууд цар тахлын үед ахмадуудын нэрийг барьж хүнсний багц олгох нэрийдлээр “Агууша фүүдс” ХХК-тай хууль зөрчин 69.2 сая төгрөгөөр чихэр худалдаж авах гэрээг байгуулжээ. Төсвийн мөнгийг хууль зөрчин зарцуулсан энэ үйлдэл аудитын шалгалтын явцад ил болоод байгаа юм.
Төсвийн хулгай гэж хэлж болох 69.2 сая төгрөгөөр чихэр худалдаж авсан үйлдэлд но-той хэд хэдэн асуудал бий. Нэгт Баянгол дүүргийн ЗДТГ-ын гэрээ байгуулсан “Агууша фүүдс” ХХК 2021.09.14-ны өдөр Улсын бүртгэлийн ерөнхий газарт хуулийн этгээдээр бүртгүүлж үйл ажиллагаагаа эхлүүлсэн. Үүнээс хойш ердөө 10 хоногийн дараа буюу 2021.09.24 өдөр Баянгол дүүргээс 69.2 сая төгрөг гаргуулж авсан. Хоёрт энэхүү худалдан авах ажиллагааг ямар нэгэн тендер зарлалгүй шууд зохион байгуулсан нь хардлага төрүүлж байгаа юм. Хэний ашиг сонирхолд нийцүүлж хууль зөрчин төсвийн мөнгөөр чихэр авсан бэ гэдгийг хуулийн байгууллагууд шалгаж тогтоох хэрэгтэй. Цар тахлын үед ахмадуудад хүнсний багц болгон мах, гурил, будаа бус чихэр олгох гайхамшигтай санааг сэдэж олсон Баянгол дүүргийн удирдлагуудын төсвийн мөнгийг үр ашиггүй зарцуулсан үйлдэл үүгээр зогсохгүй.
-Засгийн газрын 43 дугаар тогтоолыг Баянгол дүүргийн удирдлагууд уландаа гишгэж төсвийн мөнгөн дээр туйлжээ-
Цар тахлаас шалтгаалж эдийн засгийн байдал хүндэрсэн тул төсвийн хөрөнгийг үр ашигтай, хэмнэлттэй зарцуулж, шаардлагагүй зардлуудаа хэмнэхийг төрийн бүх шатны байгууллагуудад Засгийн газраас даалгаж 43 дугаар тогтоолыг 2021 онд баталж байсан. Тус тогтоолд төсвийн мөнгөөр урлагийн наадам, спортын уралдаан тэмцээн, салбарын өдөрлөг, аялал зугаалга зэргийг зохион байгуулахыг хориглосон байдаг. Гэвч Баянгол дүүргийн удирдлагууд Засгийн газрын тогтоолыг үл тоомсорлож татвар төлөгчдийн мөнгийг цацах шиг болжээ.
Тухайлбал:
- Тавилга, эд хогшил худалдаж авахад - 48.5 сая төгрөг
- Контент бүтээхэд - 36 сая төгрөг
- Албан хаагчдад гарын авлага хэвлүүлэхэд - 24.7 сая төгрөг
- Явган аялал зохион байгуулахад - 6.9 сая төгрөг
- 25-р хорооны албан хаагчдын сагсан бөмбөгийн тэмцээнд - 9.1 сая төгрөг
- Санхүүгийн ажилтнуудын спортын арга хэмжээнд - 5 сая төгрөг
- Санхүүчдэд хүндэтгэл үзүүлэх арга хэмжээнд - 7.3 сая төгрөг
- Хороодын нийгмийн ажилтны сургалт, тараах материал хэвлэхэд - 9.2 сая төгрөг
- Сургалт зохион байгуулахад - 7 сая төгрөгийг тус тус зарцуулж төсвийн хууль болон Засгийн газрын 43-р тогтоолыг удаа дараа зөрчжээ.
Түүнчлэн Баянгол дүүргийн Засаг даргын Тамгын газар шилэн дансандаа 860 сая төгрөгийн 33 санхүүгийн гүйлгээгээ ил тод мэдээлээгүй нууцалжээ. МАН-ынханы ам, ажлын зөрүү товчхондоо ийм байна. Тэд хэмнэлтийн горимд ингэж ажилладаг аж. Ганцхан Баянгол дүүргийн ЗДТГ-ын 2021 оны санхүүгийн тайлан, төсвийн гүйцэтгэлд хийсэн аудитын шалгалтаар 1.5 тэрбум төгрөгийн зөрчил илэрсэн байх жишээтэй. Эрх баригч намын дарга, Засгийн газрын тэргүүн Л.Оюун-Эрдэнэ “Авлигалтай тэмцэнэ гэдэг бол намынхаа нөхөдтэй тэмцэнэ гэсэн үг” гэж хэлж байсан удаатай. Ерөнхий сайд үнэхээр үнэнээ хэлсэн. МАН-ын засаглалын эрин үед төсвийн хулгай төгсөрчхөөд байна шүү дээ.
Г.Жүгдэр Тойм.мн
