Жүрмэдийн хоёр чих, хамрыг огтолж, цээжин дээр нь таван хошуу сийлэн, хөлийн шөрмөсийг сугалж, тасгийн дарга Самбуугийн үе мөчөөр нь жиргэн, зүрхийг нь сугалж алсан...
1938 оны 12-р сарын 31-ны өдөр хилийн дугаар отрядын Хөх усны заставын тасгийн дарга Содном ахлагчтай 3 хилчин постын үүрэг гүйцэтгэж байтал 500 орчим дээрэмчид хил зөрчин орж ирж, хүч тэнцвэргүй тулаан өрнөх нь тэр.., амь хайргүй тулалдсаар хилчин Дүрсээ амь эрсдэж, Халтархүү үхлүүт шархдан, тасгийн дарга Содном эцсээ хүртэл тулалдсан ч аргагүй хүчин мөхсдөж дээрэмчдийн гарт оржээ.
Харгис хэрцгий тамлалт яргалалыг сөрөн эцсээ хүртэл шүд зуун, тангарагаа үнэнч үлдсэн Содномыг дайснууд хүний ёсноос гажуудаар тамлан зовоож, толгойгоор нь галд шарж алж, хорслоо тайлсан байдаг. Үдэш ухаан орсон Халтархүү хөл нүцгэн мөлхсөөр 30 гаруй километр явж заставтаа хэл хүргэж, улмаар Заставын дарга Хандын Жүрмэд 6 хүнтэй түргэн групп авч тулгаралт болсон Атасын хар ам гэх газар луу гарчээ. Заставаас очсон бүлэг мөн л дээрх дээрэмчидтэй олон цаг тулалдсаны эцэст хүчин мөхсдөж хүчээр хэдэн арав дахин олон дайснуудад арга буюу цохигдсон байна. Дээрэмчид заставын дарга Жүрмэдийн хоёр чих, хамрыг огтолж, цээжин дээр нь таван хошуу сийлэн, хөлийн шөрмөсийг сугалж, тасгийн дарга Самбууг үе мөчөөр нь жиргэн, нугалж, зүрхийг нь сугалж, бусад хилчдийг галд шатааж шарж хороожээ…
Жигшүүртэй гэхэд даанч жигшмээр, харамсалтай гэхэд дэндүү харамсалтай ийм нэгэн явдал 80 гаруйхан жилийн өмнө эх орны өмнөд хилд өрнөсөн байна. Манай зоригт найман хилчин хоёр өдрийн турш 500 дээрэмчдийн эсрэг баатарлагаар тэмцэж, ихээхэн хохирол учруулсанд хорссон дээрэмчид ийн бузар яргалал үйлдсэн байдаг.
Эх орныхоо төлөө хамгийн түрүүнд хортон дайсантай тулгардаг хилчдийн хувьд ийм баатарлаг тулгаралт, тийм харуусам түүх тоолж баршгүй их гардаг билээ...
Эх орон, элгэн садан, ирээдүй хойчийнхоо төлөө эцсийн дусал цусаа шавхан тэмцсэн хорин настай хөвгүүдээ бодохуйяа харуусмаар, хайрламаар, бахархмаар...
