УИХ-ын гишүүн С.Одонтуяа:
-"Энэ оны улсын төсвийг тодотгох шаардлагатай. Бид ямар хэмнэлт хийх саналаа тусган, Засгийн газарт хүргүүлнэ. Нэг л жишээ хэлэхэд бид Төрийн ордон руу гаднаас зочин оруулахын тулд 3 хувь албан бичиг үйлддэг. УИХ маш их цаас хэрэглэдэг. Энэ мэт үрэлгэн зардлыг бууруулж болно. Цахим үндэстэн болох ёстой. Чили олон зуун км-ын цаанаас БНХАУ-д нүүрс нийлүүлж байхад 200 км-ын цаанаас нүүрсээ худалдаж чадахгүй байгаа нь арчаагүй байдалтай холбоотой. Нүүрс, зэсийн үнэ маш өндөр буюу түүхэн дээд түвшинд хүрлээ. Бид уул уурхайн бүтээгдэхүүнээ гаргаж чадахгүй байгаа нь бодит шалтгаан биш, шалтаг. НӨАТ одоо 10 хувь байгааг 5 хувь болгосноор далд эдийн засаг байхгүй болно" гэв.
УИХ-ын гишүүн Д.Ганбат:
-"Манай Засгийн газар вакцинжуулалтыг маш үр дүнтэй явуулсан. "Оюу толгой" компанитай сайн хэлэлцээ хийсэн. Энэ мэт сайн ажлууд бий. Гэхдээ одоо үүссэн үнийн өсөлтөд Засгийн газар дангаараа хариуцна. Р.Адъяасүрэн гишүүн тойрогтоо ажиллаж, багийн дарга нарыг унаажуулах ажилтай яваа. Ерөнхий сайдын хэлсэн асуудалтай холбоотой асуултыг өөрөөс нь асуугаарай" гэв.
УИХ-ын гишүүн Б.Пүрэвдорж:
-"Нийслэлээс Найрамдал зуслан орох зайд 85 сая төгрөгөөр тээвэр хийж байна. Дарга нарт энэ нь ашигтай байна. Авлигын энэ асуудлыг би хоёр жил ярьж байгаа ч арга хэмжээ авахгүй байна. Бид өнөөдөр Ерөнхийлөгчтэй уулзсан.
Хөгжлийн банкны чанаргүй зээлийг хурдан төлүүлэхийн тулд төрийн байгууллагуудын өрийг хурдан төлүүлэх нь зөв. ХХБ-тай холбоотой 500 орчим тэрбум төгрөгийн зээл бий. Эрдэнэтийг авсан эх үүсвэрийг нь энэ зээлээс суутгах замаар асуудлыг шийдэж болно" гэв.
