Оюутан залуус хоёр өдөр Сүхбаатарын талбайд тайван жагсаал, цуглаан хийж эрх баригчдыг ажлаа хийхийг шаардлаа. Төрд шургалсан гэмт хэрэгтнүүдийн хэрээс хэтэрсэн тансаглал, иргэдийн татвараар бүрдсэн улсын төсвийн мөнгийг тэрбум тэрбумаар нь хувьдаа завшсан үйлдлүүд, өнөөгийн төр, засгийн сул дорой, чадваргүй байдал, үнэ ханшийн өсөлт, инфляцын галзуурал гээд олон асуудал залуусын бухимдлыг төрүүлж, талбай дээр авчирчээ. Тэд нэн шинэ үеийнхэн гэдгээ харуулж төр, засагтаа шаардлагаа зөв, боловсон хэлбэрээр, тууштай, дорвитой тавьж, Ерөнхий сайдыг гаргаж ирэн ам өчгийг нь авч чадсан.
Залуустаа загнуулсан Ерөнхий сайдад ажлаа сайн хийх л сонголт үлдсэн. Энэ засаг арчаа муутай, ажилгүй, анхиагүй байгаа нь үнэн. Авлигачид, албан тушаалын хэнээтнүүддээ тал засаж, төрийн албанд бөглөө таглаа болгосоор байгаа нь ч үнэн.
Монголын нийгмийг ийм болгосон буруутнууд гэвэл өнөөгийн эрх баригчдаас гадна Ардчилсан намынхан ч хариуцлагыг эн тэнцүү үүрэх учиртай. 1992 оны Ардчилсан Үндсэн хууль батлагдсанаас хойших 30 жилд МАН, АН хоёр ээлжлэн төрийн эрх барьж ирсэн. Ардчилсан нам 1996-2000, 2012-2016 онд засгийн эрх барьсан. Мөн 2004-2008 онд МАН-тай эвсэн хоёр жилээр ээлжлэн засаг барьсан. Нийт 10 жил нь засгийн эрхийг барьсан энэ нам өнөөдөр эрх мэдэл, сүр хүчиндээ эрдсэн эрх баригчдын эсрэг хүчтэй сөрөг хүчин болж, ард түмнээ, ардчиллаа өмгөөлж, хамгаалах ёстой. Харамсалтай нь Ардчилсан нам сөрөг хүчин байтугай “гөлөг” хүчин байж чадахгүй болтлоо доройтон, хоёр дарга, хоёр тамгатай, тулга тойрсон хэрүүлтэй сууж байна. Шинэ үеийн залуус бухимдан босох нэг шалтгаан, түлхэц нь Ардчилсан намын энэ арчаагүй дорой байдал мөнөөс мөн. Ардчилсан нам ардчиллаа өмгөөлж хамгаалж, УИХ, Засгийн газрын бүх түвшинд эрх баригчдад хяналт тавьж, шаардаж шахах тэнхэлгүй, тийм чадавхигүй болсон тул залуучууд сөрөг хүчний ажлыг хийж өглөө. 2016, 2020 оны УИХ-ын болон орон нутгийн сонгуульд МАН сайндаа ялсан юм биш АН муу байсан учраас ард түмэн арга буюу сонголт хийсэн гэдэг сануулгыг ардчилагчид гэгдэх улс төрийн хүчин өнөөг хүртэл ухаарч сэхээрээгүй нь ийм байдалд хүргэв.
Гэхдээ энэ муу юм биш. Баабарын хэлдгээр Ардчилсан нам ёроолдоо унаж байгаа нь тэр. Одоо эргэж хурдан сэргэх л үлдлээ, тэдэнд. Хоёр өдрийн жагсаал, цуглаанаас харахад ардчилал, хүний эрх, эрх чөлөөг дээдэлдэг, улс төр, нийгмийн харилцааг цоо шинээр хардаг залуу үе өсөж өндийжээ. Тэд өнөөгийн эрх баригчид төдийгүй сөрөг хүчин байж чадахгүй байгаа Ардчилсан намынхныг ч “Ажлаа хий” гэж хатуу шаардлаа. Тамга булаацалдсан тамын тогооны үлгэрээ дуусга гэж сануулга өглөө. Ирж яваа цагийн дууг харьж яваа хүн дуулдаггүй гэдэг үгийг шинэ үеийн залуус МАН, АН-ынханд тод чанга хэлж өглөө. Ардчилсан намынхан ч бас “Ажлаа хий”.
