Үнийн өсөлтийг эсэргүүцэж тэгш боломжийг шаардсан залуучуудын жагсаал өчигдөр 10.00 орчим цагаас эхлэн Сүхбаатарын талбай дээр шөнө дөл болтол үргэлжлэв. Өргөн хэрэглээний барааны үнэ нэмэгдсэн. УИХ Засгийн газрыг ажлаа хийхийг шаардсан.
Тэд "Амьдармаар байна", "Эх орондоо үлдэхсэн" “Эзэн заяа хоёр зэрэг хичээгээд ч болохгүй байна ш дээ” “Эх орондоо лалрын амьдармааргүй байна””Гадаадад бүх хүний нөөцөө гаргамааргүй байна” гэхчлэн лоозон барьжээ. Жагсаалын агуулга зорилго нь энэ бүхнээс уншигдана
Жагсагчдын үндсэн шаардлага төр засгийн удирдлагууд ажлаа хий, тэгш эрх, тэгш боломж олгох тухай байлаа. “76-уулаа биш гурван саяулаа сайхан амьдаръя” гэж уриалав. Тэгснээс хэн нэгнийг огцруулах, аль нэг намыг буруутгах бус харин эрх баригчдыг ажлаа сайн хийхийг шаардаж буй. Ерөнхий агуулгаараа энэ жагсаал улстөржөөгүй, эрүүл саруул дүр төрхөөрөө ялгарч харагдсан.
Жагар мэтийн хөлсний жагсагчид өдөр нь хөөгдөж, орой нь “миний жагсаалыг дээрэмдчихлээ ш дээ” гэх дүрс бичлэг цахим орчинд явж байгаа харагдсан. Орой 23 цагийн үед жагсагчид Бага тойруугаар явж, энэ үеэрээ илэрхийлж буй үйлдэлд нь сэтгэлийн хөдлөл хөөрөл ажиглагдаж эхэлсэн. Ийм үеэр нь хэн нэгний хутган үймүүлэгчид энэ залуусыг тухирах вий гэсэн болгоомжлол байв. Хутган үймүүлэгч нар орж самарчихгүй л бол итгэл үнэмшлээрээ цугларсан залуус соёлтой жагсдаг юм байна гэдгийн нотолгоо байлаа.
ХЗДХ-ийн сайдын хэлснээр жагсагчдад том машинаас согтууруулах ундааны зүйл тараасан, хуурамч гал нээж олон нийтийг тухирсан гэжээ. Мөн зарим улс төрчдийн зүгээс жагсагчдыг тухирч байгааг ч дурджээ.
ЦЕГ-ын ХМОНХ-ийн дарга Б.Баатархүү сэтгүүлчдэд мэдээлэл өгөх үеэрээ "Мэдээж иргэдийн үзэл бодлоо илэрхийлэх эрх чөлөөг хүндэтгэнэ. Гэхдээ жагсаалд архи, согтууруулах ундаа хэрэглэсэн хүмүүс явж байна. Насанд хүрээгүй хүүхдүүд ч байна. Бас зориуд турхирч, гал нээн чимээ гаргаж, жагсаалын уур амьсгалыг эвгүй болгох оролдлогуудыг хийж байна. Жагсаалд оролцож буй хүмүүс дотроос энэ мэдээллүүдийг бидэнд давхар өгч байгаа юм. Тэгэхээр анхаарал болгоомжтой оролцохыг иргэддээ анхааруулж байна" гэдгийг сануулсан.
Монголын залуус эх орныхоо төлөө зүрх сэтгэлээрээ нэгдэж “Эх орондоо эзэн байхын төлөө” сэрсэн сайхан өдөр гэж онцлох нь зөв байх. Монголын залуусаа нэгдэж, тэмцэж чадаж буйг харах сайхан байна гэсэн сэтгэгдлийг иргэд олноороо илэрхийлж байлаа.
ХЗДХ-ийн сайд Х.Нямбаатар жагсагчидтай уулзаж, шаардлагыг нь хүлээн авч Ерөнхий сайдад танилцуулж хариу өгнө гэдгээ илэрхийлсэн. Улс төрийн талаасаа соёлтой зөв хандлага гэж харагдсан. Шөнө 24 цаг өнгөрч байхад тэрбээр цахим хуудастаа мэдээлэл оруулжээ.
Тэрээр "Залуусын зүгээс долоон ерөнхий шаардлага тавьсан, бид танилцсан. Ерөнхий сайд эдгээр шаардлагатай танилцаад, салбар салбарын сайд нарыг оролцуулсан ажлын хэсэг шинээр байгууллаа. Энэ хүрээнд залуусын шаардлагыг биелүүлэх гарц, шийдлийг боловсруулж, эргээд олон нийтэд мэдээлнэ" гэжээ.
Өнөөгийн Ерөнхий сайд Л.Оюун-Эрдэнэ ч бас нэгэн цагт талбай дээр жагсаж, М.Энхболдыг гарч ирэхийг шаардаж зогссон нэгэн. Харин цаг нь ирэхээр өөрөө талбай дээр гарч ирсэнгүй. Зүй нь тэр залуус дээрээ өөрөө очиж, тэдний үгийг сонсож, үгээ хэлж үүрэг хариуцлагын хүрээнд хийж хэрэгжүүлж буй ажил зорилгоо тэдэнтэй хуваалцах нь зөв байсан юм.
