Өнөөдөр Монголын Ардчилсан нам байгуулагдсан түүхэн өдөр. 1990 оны дөрөвдүгээр сарын 7-ны өдөр тус нам байгуулагдаж, Монголын хоёрдогч хүчин мэндэлсэн түүхтэй. Энэ өдрийг тохиолдуулан Нийслэлийн Ардчилсан намын дарга Э.Бат-Үүл болон Ардчилсан намын удирдлагууд мэдээлэл хийлээ.
Э.Бат-Үүл “Ардчилсан намын анхдугаар их хурлын төлөөлөгчиддөө энэ завшааныг ашиглан мэндчилгээ дэвшүүлье. Баярын мэндийг нийт намынхаа гишүүдэд хүргэе. Ардчилсан нам Монголыг Зөвлөлтийн колоничлолоос чөлөөлсөн баатрууд. Баатрууддаа дахин баяр хүргэе. Гэхдээ 32 жилийн дараа ардчилалд дахин нэг сорилт тулгарлаа. В.Путины Украин руу дайрсан түрэмгийлэл бол ардчилалд зарласан дайн. ОХУ-ын Элчин сайдын зүгээс Ардчилсан намд хаягласан мэдэгдэл ч нотолно. Ардчилсан намыг хоёр дахь Украин шиг үзэж байгаа ийм бүдүүлэг нөхцөл байдал бий болсон. Тиймээс намынхаа баатруудад хандаж хийх ажил их байна гэж уриалмаар байна. Бид Монголын ухамсраас колоничлолыг хөөх их ажил байна” хэмээсэн юм.
С.Эрдэнэ даргатай Ардчилсан нам ийнхүү мэдэгдэл хийж байхад Ардчилсан намын даргын сонгуульд ялалт байгуулсан Монгол Улсын тав дахь Ерөнхийлөгч асан Халтмаагийн Баттулгыг намын даргаар ёсчлон батламжлах ээлжит бус их хурал болж байна.
