БНХАУ-ын Шанхай хотод COVID-19-ийн “Omicron” хувилбарын BA.1.1 шинэ дэд хувилбар бүртгэгдсэн талаар “Global Times” сонин мэдээллээ. Энэ хувилбар өмнө нь БНХАУ-д болон олон улсын “GISAID” судалгааны байгууллагад бүртгэгдэж байсан хувилбаруудаас эрс өөр байгааг онцолж байна.
Мөн Далянь хотод батлагдсан COVID-19-ийн халдварын тохиолдол БНХАУ-д өмнө нь бүртгэгдэж байсан “коронавирус”-ийн хувилбаруудаас өөр байсан талаар орон нутгийн захиргаа нь мэдээлсэн байна.
Ням гарагт БНХАУ-д анх удаа COVID-19-ийн халдварын 13 мянган тохиолдол шинээр бүртгэгджээ. Үүнээс 9000 гаруй нь Шанхай хотод батлагдсан байна.
COVID-19-ийн халдварын тархалт эрчимжиж байгаагаас Шанхай хот 25 сая оршин суугчаа шинжилгээнд хамруулахаар бэлтгэж байгаа аж. Энэ хүрээнд БНХАУ-ын Ардын чөлөөлөх арми 2000 гаруй цэргийн эмчийг бэлэн байдалд шилжүүлсэн байна.
Үүнээс гадна Шанхайгаас 60 гаруй километрийн зайд орших хотын оршин суугчаас “Omicron” хувилбарын BA.1.1 дэд хувилбарын халдвар илэрсэн нь анхаарал татаж байгаа аж.
