2022 оны Бээжингийн өвлийн паралимпийн нээлтийн ёслол өчигдөр буюу гуравдугаар сарын 4-ний орой БНХАУ-ын Бээжин хотын Үндэсний спортын цэнгэлдэх хүрээлэнд болов. Нээлтэд БНХАУ-ын дарга Ши Жиньпин, Олон улсын Паралимпийн хорооны дарга Эндрю Парсонс нар оролцжээ.
“Бээжин-2022” өвлийн паралимпийн наадамд Монгол Улсаас гурван тамирчин эх орноо төлөөлөн оролцох билээ. Тухайлбал, Б.Ганболд, Ц.Дашдорж нар энэ сарын 7-нд гүйлтийн цанын 20 км-ын сонгомол техникийн төрөлд уралдах бол энэ сарын 12-нд 12.5 км-ын тэших техникийн төрөлд өрсөлдөх юм. Харин уулын цанын төрөлд Б.Цэрэнпунцаг нар уралдана. Тэрбээр паралимп төдийгүй олимпын наадамд ч Монголоос анх удаа уулын цанын төрөлд уралдаж байгаагаараа онцлог.
АНУ-ын нэрийн өмнөөс кёрлингийн төрөлд өрсөлдөх У.Бат-Оюун өчигдөр Монголынхоо баг тамирчидтай уулзжээ. Тэрбээр нээлтийн ёслолын дараа Монголынхоо баг тамирчдыг сурагласаар олж уулзан, дурсгалын зураг татуулсан байна.
Нийт 10 хоног үргэлжлэх энэ удаагийн паралимпийн наадамд 48 орны 650 гаруй тамирчин 78 багц медалийн төлөө өрсөлдөнө.
