Прокурорын байгууллагын удирдах ажилтны 2022 оны нэгдсэн зөвлөгөөн өчигдөр болов. Уг зөвлөгөөнд Хууль зүй, дотоод хэргийн яамны Төрийн нарийн бичгийн дарга П.Сайнзориг хүрэлцэн ирж мэдээлэл хийсэн юм. Энэ үеэр тэрбээр Зөрчлийн тухай хуультай холбоотой хэд хэдэн асуултад хариулт өгчээ. Тухайлбал, "Эрүүгийн хуулийн нэмэлт өөрчлөлтөөр гэмт хэргийн шинжийг тодорхой болгох, ялангуяа авлига албан тушаал, эдийн засгийн гэмт хэргүүд, улсын хил зөрчих зэрэг гэмт хэргүүдийн шинжийг тодорхой болгох, хэрэг хянаж шийдвэрлэх ажиллагаанд тулгамдаж байгаа процессын хууль эрх зүйн тодотголуудыг хийнэ. Мөн Зөрчлийн тухай хуулийг боловсронгуй болгоход хамтран ажиллах, ялангуяа технологийн давуу талыг ашиглаж, зөрчлийн хэрэг шалган шийдвэрлэх ажиллагааг үр дүнтэй зардал багатай явуулах, цаашлаад зөрчлийн мэдээллийн сан үүсгэх, зөрчлийн хэргийн оролцогчид мэдээллээ хардаг, нотлох баримтуудаа явуулах байдлаар зөрчлийн хэргийг цахим хавтаст хэрэгт оруулах зэрэг хамтарч ажиллах шаардлагатай байгаа асуудлуудын талаар энэ зөвлөгөөнөөр ярилцлаа" хэмээн онцолжээ.
Зөрчлийн тухай хуулийг боловсронгуй болгох, өөрөөр хэлбэл илүү тодорхой, ойлгомжтой болгоход юуг анхаарах талаар Хууль зүй, дотоод хэргийн яамны Төрийн нарийн бичгийн дарга П.Сайнзориг хэлэхдээ,
-Зөрчлийн тухай хуультай холбоотойгоор иргэдэд ойлгомжгүй байдаг зүйл заалтуудыг засах, прокурор хяналт тавихад тодорхойгүй байсан зарим зүйл, заалтуудыг боловсронгуй болгоход хамтран ажиллана. Зөрчлийн хуулиар торгуулиа хугацаанд нь барагдуулж байгаа иргэдийн шийтгэлийг хоёр дахин хөнгөрүүлэх, баривчлах шийтгэлийг оногдуулахгүй байх этгээдийн хүрээ хязгаарыг энэрэнгүй хүмүүнлэг ёсны зарчимд нийцүүлж өргөжүүлж байгаа. Уг хуулийн тусгай ангид хэт ерөнхий байдлаар тодорхойгүй бичигдсэн зүйлүүдийг прокурорын байгууллагатай хамтран илүү оновчтой тодорхойлох, зөрчлийн процесс ажиллагаан дахь хүний эрх, эрх чөлөө зөрчигдөхөөс урьдчилан сэргийлэх ажиллагааг хэрхэн сайжруулах чиглэлээр ярилцсан үр дүнтэй уулзалт зөвлөгөөн боллоо. Мөн гэмт хэрэг, зөрчлийн улмаас учирч байгаа хохирлыг нөхөн төлүүлэх, хохирогчдын сэтгэл санааны хохирлыг барагдуулах чиглэлээр эрх зүйн шинэчлэлийг хийх зэрэг тулгамдаж байгаа асуудлаар хэрэг хянан шийдвэрлэх ажиллагаанд хяналт тавьж ажилладаг прокуроруудтай санал солилцлоо хэмээв.
