Нийслэлийн засаг дарга бөгөөд Улаанбаатар хотын захирагч Д.Сумъяабазар авто замын хөдөлгөөний ачааллын талаар өөрийн байр сууриа зарим хэвлэлд илэрхийлжээ. Түүний хувьд авто замын түгжрэлийг бууруулахын тулд тодорхой арга хэмжээ авна. Уг арга хэмжээ нь шат дараалалтай, бодлогын шинж чанартай, цогц байх тухай дурдсан байна. Асуудлыг цогцоор нь харж, шийдлээ тодорхойлохгүйгээр ганц нэг арга хэмжээг салгаж авснаар Улаанбаатар хотын түгжрэл арилахгүй. Тиймээс ч цогц шийдэл ярьж буй нь хотын мээрийн зөв.
Нийслэлийн засаг дарга бөгөөд Улаанбаатар хотын захирагч Д.Сумъяабазар “Улаанбаатар хотыг буруу талдаа хүрдтэй авто машинаас салгана” гэх үгэнд олон хүн эгдүүцэж, эсэргүүцэл илэрхийлж байгаа нь сошиал орчинд шуугиан тарьж эхлэв. Энэ үгийг Д.Сумъяабазар өнөөдөр л хэлж, иргэд сая л сонсчихсон хэрэг биш л дээ. Тодруулбал, 2013 онд Э.Бат-Үүл нийслэлийг засаглаж байх үедээ буруу талдаа хүрдтэй авто машиныг хориглох тухай ярьж байлаа. Тэр үед тухайн үеийн Ерөнхийлөгч Ц.Элбэгдорж хотын даргыг зандарч, загнаж, шүүмжилснээр уг яриа ажил хэрэг болоогүй.
Тэгвэл бараг 10 жилийн дараа буруу талдаа жолооны хүрдтэй, арлын орны авто машиныг хориглох тухай яриаг Нийслэлийн засаг дарга Д.Сумьяабазар ийнхүү дахин сөхлөө. Тэрбээр 2021 оны арваннэгдүгээр сард УИХ-ын нэгдсэн чуулганы хуралдааны үеэр энэ санаагаа анх цухуйлгаж байсан юм. Тухайн үед хэн ч үүнийг тоогоогүй, өлгөж аван асуудал тавиагүй.
Улаанбаатар хотын хүн амын өсөлт жилдээ 30 гаруй мянга бөгөөд үүнтэй уялдаж 80 гаруй мянган тээврийн хэрэгсэл нэмэгддэг тоон мэдээлэл бий. Ингээд үзвэл өнөөдрийн байдлаар 630 гаруй мянган тээврийн хэрэгсэл Улаанбаатар хотод бүртгэгдсэн байна. Мэдээж хэрэг тээврийн хэрэгслийн дийлэнх хувийг ад үзээд буй буруу талдаа хүрдтэй авто машин эзэлдэг.
Ийм нөхцөлд шууд л хааж, боох тухай ярихаасаа өмнө одоо байгаа буруу талдаа хүрдтэй тээврийн хэрэгслийг хэрхэн зорчуулах вэ, хэдий хугацаанд иргэдийг одоогийн машинаа унах, солих боломжоор хангах юм. Хэрэглээнд зориулагдсан авто машины насжилт ямар хэмжээнд байх, ямбий машины оршуулгын цэг нь Улаанбаатар хот мөн үү, үгүй юу гэдгийг гаргасан тоон судалгаа байна уу гэх мэтээр нарийвчлалтай тооцоо судалгаа хийгээд танилцуулах учиртай. Гэтэл өнөөдөр ийм асуудал огт яригдахгүй байгаа нь харамсалтай.
Зөвхөн авто тээврийн хэрэгслийн тоо жилд дал, наян мянгаар нэмэгдээд байгаа учраас буруу талдаа хүрдтэй ямбий машиныг тас хориглох болно гэх нь хэр оновчтой шийдэл юм бол Засаг даргаа. Ингэж мухайрлах нь хийхээр зорьж буй цогц ажлыг тань үнэгүйдүүлээд байгааг хэлж, зөвлөчих нэгэн шадар туслахууд дунд чинь алга уу хотын дарга аа. Авто замын сүлжээ муутай, ачаалал сааруулах арга хэмжээ авахгүй байж иргэдийн хөл дүүжлэх авто машиныг ад үзээд байх нь зөв гаргалгаа биш байх. Ингэхийн оронд хэрхэн зохицуулж, түгжрэлийг сааруулж болох вэ гэдэг шийдлээ олох нь зөв биз.
Цаашид буруу талдаа хүрдтэй машиныг ашиглалтаас гаргах шийдлээ олтол явуулахаас өөр сонголт байхгүй. Тав, эсвэл 10 жилийн дараа тас хорино гэчихлээр хүрдээ солиулах гэж хэдэн төгрөг зарлагадах уу, эсвэл гэсэн сонголт иргэдэд ирнэ. Энэ нь, эргээд иргэдэд чирэгдэл үүсгэж, санхүүгээр шийдэх болон эд хөрөнгөө хаях уу, засах уу гэдэг дарамт үүсгэнэ. Ер нь, ийм төрийн шийдвэр гэж үгүй. Иргэнээ бодсон хүмүүнлэг ардчилсан нийгэм цогцлоох тухай лоозон бүхий Үндсэн хуультай Монгол Улс шүү дээ. Эцэг хуулиа харж, иргэнээ сөхрүүлэх, элдэв шийдвэрийг төр нь гаргамааргүй л байгаа юм гэдгийг иргэд ч хэлсээр байна. Аливаа шийдвэр, тогтоол иргэнийхээ эсрэг байж болохгүй.
