УИХ-аас байгуулсан Тусгай хамгаалалттай газар нутгийн тухай хуулийн хэрэгжилтэд хяналт шалгалт хийж, санал дүгнэлт гаргах үүрэг бүхий ажлын хэсэг өнөөдөр хуралджээ. Ажлын хэсэгт УИХ-ын гишүүн Ж.Батжаргал, Т.Аубакир, Б.Бейсен, Г.Мөнхцэцэг, Б.Саранчимэг болон холбогдох яамд, мэргэжлийн байгууллагынхан багтсан юм. Энэ үеэр Богдхан уулын дархан цаазат газрын хамгаалалт, газар ашиглалт зэрэг асуудлын хүрээнд оролцогчид танилцуулга хийсэн байна. Тухайлбал тусгай хамгаалалттай газар нутагт зөвшөөрөлгүй бүтээн байгуулалтын ажил хийж байгаагаас үүдэж байгаль экологид олон талын сөрөг нөлөө үзүүлж байгааг онцолжээ. Мөн жилдээ 30-40 мянган аялагчид аялж, хог хаях зэрэг зөрчил гарч байгааг Богдхан уулын дархан цаазат газрын хамгаалалтын захиргаанаас мэдэгдсэн байна.
Баянзүрх дүүргийн Засаг даргын захирамжаар тусгай хамгаалалттай газар нутагт үйл ажиллагаа явуулж байгаа аж ахуй нэгж байгууллагууд зохих зөвшөөрлийн дагуу ажиллаж байгаа эсэхэд хяналт шалгалт хийхэд аялал жуулчлалын чиглэлээр газар эзэмших гэрчилгээ авсан ч амины орон сууц барих зөрчил илэрсэн байна. Тиймээс Байгаль орчин аялал жуулчлалын яам болон холбогдох газруудад албан бичиг хүргүүлжээ.
