Дэлхийн шилдэг эмэгтэй уран гулгагч К. Валиевагийн допингийн сорилоос болж Бээжингийн олимпын уран гулгалтын багийн тэмцээний медаль гардуулах ёслол хоёр өдөр дараалан хойшлоод байна. "Бээжингийн олимпод багийн тэмцээнд түрүүлсэн ОХУ-ын уран гулгалтын шигшээ багийн алтан медаль гардуулах ёслолыг хойшлуулсан шалтгаан нь уран гулгагч Камила Валиевагийн допингийн шинжилгээ" гэж Inside the Games цахим хуудсанд бичжээ. Дэлхийн допингийн эсрэг дүрэмд зааснаар 16-аас доош насны тамирчдад допинг илэрвэл тэднийг гэм буруутай гэж үзэх боломжгүй байдаг аж.
ОХУ-ын гавьяат дасгалжуулагч Татьяна Тарасова РИА Новости агентлагт өгсөн ярилцлагадаа "Оросын багийг Бээжингийн олимпод амжилтгүй оролцуулах зорилгоор Камила Валиевагаас допингийн шинжилгээ авсан тухай гадаадын хэвлэл мэдээллийн хэрэгслүүд зориуд мэдээлсэн" гэж мэдэгджээ. Энэ нь "Inside the Games" портал Валиеваг допингийн шинжилгээ өгсөн гэж мэдээлснийг хэлж байгаа аж: Тарасова "Үүнийг тэд санаатайгаар хийсэн. Валиеваг допинг хэрэглэсэн гэдэгт итгэхгүй байна" гэжээ.
Хэвлэлүүдэд мэдээлснээр, одоо энэ асуудлаар талууд зөвлөлдөж байгаа аж. Энэ хэлэлцээ пүрэв гарагт ч үргэлжлэх төлөвтэй байгаа гэнэ. Хэрэв Валиева гэм буруутай нь тогтоогдвол түүний насны онцлогоос шалтгаалж шийтгэл нь арай бага байх магадлалтай. Үүний зэрэгцээ энэ асуудалд түүний багийн үүрэг, оролцоо, хариуцлагын асуудлыг ч сайтар судлах болно гэдгээ зохион байгуулагчид хэлж буй аж.
ОХУ-ын Уран гулгалтын холбооны (FFKKR) хэвлэлийн төлөөлөгч Ольга Ермолина хэлэхдээ, тус байгууллагад энэ талаар албан ёсны мэдээлэл ирээгүй байна гэжээ. Камила Валиева эдүгээ 15 настай бөгөөд Олимпын наадамд оролцсон анхны тэмцээнээ насанд хүрэгчдийн тэшүүрээр эхэлж байгаа төдийгүй өмнө нь оролцсон бүх тэмцээндээ нэг ч ялагдал хүлээгээгүй яваа аж. Тэрбээр Европын болон Оросын аварга шалгаруулах тэмцээнд түрүүлсэн бөгөөд хоёр үзүүлбэрээр дэлхийн дээд амжилтыг эзэмшдэг юм.
Эргэн сануулахад даваа гарагт Оросын уран гулгагчид 74 оноогоор Бээжингийн наадмын багийн тэмцээнд түрүүлсэн юм. Ийнхүү өвлийн олимпын хаан спортод аваргалсан ОХУ-ын багийн гишүүд Марк Кондратюк (эрэгтэй ганцаарчилсан тэшүүр), Анастасия Мишина, Александр Галлямов (хос тэшүүр), Виктория Синицина, Никита Кацалапов (мөсөн бүжиг), Камила Валиева (эмэгтэй ганцаарчилсан тэшүүр) нар байв. Хоёрдугаар байрыг Америкчууд (65), гуравдугаар байрыг Япончууд (63) эзэлжээ. Одоогоор ОХУ-ын олимпын тамирчид хоёр алт, гурван мөнгө, таван хүрэл медальтай болоод байна.
