Монголын үндэсний бөхийн холбооноос улсын гарьд М.Бадарчтай холбоотой асуудлын талаар мэдээлэл хийлээ. 2023 онд Ардын хувьсгалын 102 жилийн ойн Үндэсний их баяр наадмын үндэсний бөхийн барилдаанд дөрөв давсан 32 бөхөөс допингийн шинжилгээ авсан. Тухайн үед улсын гарьд М.Бадарчаас хориотой бодис илэрсэн тул 2027 оны долоодугаар сарын 12-ныг дуустал дөрвөн жилийн хугацаагаар хассан юм.
Монголын үндэсний бөхийн холбооны тэргүүн Ц.Магалжав" М.Бадарчтай холбоотой асуудал бүгд хууль, олон улсын допингийн дүрмийн дагуу явж байгаа. Холбооны зүгээс М.Бадарчийн асуудалд байнга анхаарал хандуулж ирсэн. М.Бадарчтай олон удаагийн уулзалтаар бид хэлж, ярилцсан. Энэ талаар Шадар сайд Н.Номтойбаяр наадмын өмнө олон нийтэд хандаж “М.Бадарчийн барилдах эрх сэргээгдэх эрх зүйн ямар ч үндэслэл байхгүй” гэх байр суурийг илэрхийлсэн. Үүнээс биш бөхийн холбоо ямар ч бөхийн асуудлыг орхигдуулсан зүйл байхгүй гэдгийг мэдэгдье. Олон улсын болон дотоодын дүрмийн дагуу л шийдэгдээд явж байгаа. Үндэсний бөхийн холбоонд аймаг, орон нутгийн баяр наадмын талаарх гомдлууд ирж байгаа. Бид энэ талаар ирэх намраас Бөхийн холбооны хурлаар ярилцана” гэлээ.
Бөхийн холбооны тэргүүн Ц.Магалжавыг мэдээлэл хийх үеэр улсын гарьд М.Бадарч өөрийн байр сууриа илэрхийлэв. Тэрээр “Намайг барилдуулахгүй юм шиг байна. Надад ярих их юм бий. Би барилдалгүй гурван жил боллоо. Миний ярьсан юмыг хүмүүс хүлээж авахгүй байх. Маргааш болох барилдаанд барилдъя гэж бодсон чинь болохгүй бололтой" гэсэн юм.
Өнөөдөр Монголын үндэсний допингийн эсрэг байгууллагаас гавьяат дасгалжуулагч, хүндийн өргөлтийн шигшээ багийн ахлах дасгалжуулагчаар ажиллаж байсан Ц.Хосбаярыг шүүхээс хориотой эм бэлдмэл бусдад худалдсан гэм буруутайд тооцож, допингийн эсрэг арга хэмжээг авсныг мэдээллээ. Түүний тэмцээн уралдаанд оролцох эрхийг хориглож, спортын байгууллагад албан тушаал, чиг үүрэг хэрэгжүүлэх эрхгүй гэдгийг онцлов.
