Та хоолны багахан үлдэгдэл, тос, өөх, үсний сэв, 00 цаас зэргээ суултууртаа хийж урсгадаг уу? Магадгүй хаяад л усаа татах нь маш амар байдаг ч энэ үйлдэл чинь хэн нэг хүнд дараа нь маш амаргүй ажил үүсгэдэгийг мэдээд аваарай. Цэвэрлэх байгууламжид усанд уусахгүй механик хог хаягдал буюу үйлдвэр аж ахуйн газрын хаягдал үс, ноос, хялгас, нефтийн гаралтай бүтээгдэхүүн, мал нядалгааны газрын хаягдал малын сэвс, цус, дайвар, айл өрхүүдээс ариун цэврийн цаас, амны хаалт, хүүхдийн живх, эмэгтэйчүүдийн ариун цэврийн хэрэглэл, гялгар уут, бэлгэвч гэх мэт 1500-2000 кг хог хаягдал өдөр тутам урсан очдог ажээ. Та бидний санамсаргүй, хайхрамжгүйгээр хаяж орхисон энэ бүх хаягдлыг Цэвэрлэх байгууламжид ажиллагсад улаан гараараа нэг бүрчлэн түүж цэвэрлэдэг гээд бод доо. Хатуу хог хаягдлууд Цэвэрлэх байгууламжийн хоёр дамжлагат сараалжин байгууламжид торж тогтож үлдэх учиртай. Гэтэл их хэмжээний хог очдогоос болж сараалжинд тогтож үлдэх бус лаг тунгаах тунгаагуурт ордог байна.
Ингэснээр тунгаагуурын ёроолд нь лагтай хамт тунаж, тунгаагуурын лаг зайлуулах шугам сүлжээ, тунгаагуураас дараагийн байгууламж руу шахах насос, хаалт арматурт тээглэн хэвийн ажиллагааг алдагдуулдаг байна. Нормоороо бол лагийн тунгаагуурыг хоёр жилд нэг удаа цэвэрлэх учиртай. Гэтэл хатуу хог хаягдлын агууламж асар өндөр байгаагаас тунгаагуурыг жилдээ 2-3 удаа бүтэн юүлж суллан, ажиллагсад гараараа цэвэрлэгээ хийдэг байх жишээтэй. Хамгийн аймшигтай нь гялгар уут, бэлгэвч, резин зэрэг сунамтгай материалуудыг цэвэрлэхэд асар бэрхшээлтэй, ажилтнуудын нүд нүүр рүү бохир үсэрдэг байна.
Ариутгах татуургын шугамд хаягдал ус нийлүүлэх ерөнхий шаардлага буюу MNS6561:2015 стандарт гэж бий. Тэрхүү стандартыг огт хангахгүй бохир усыг төвийн шугамд нийлүүлэх нь ажилтнуудад хүндрэл үүсэгхээс гадна цэвэрлэн нийлүүлж буй усны чанарт ч сөргөөг нөлөөдлдөг гэдгийг УСУГ-ынхан санууллаа.
