Жил бүрийн гуравдугаар сарын 22-нд усны өдрийг дэлхий нийтээр нэг уриан дор тэмдэглэж өнгөрүүлдэг. Энэ жилийн хувьд “Дэлхийн усны өдөр”-ийг “Ус ба жендэр” уриан дор тэмдэглэх ажээ. ЭНэ хүрээнд УСУГ-аас нэлээд олон ажил хийхээр төлөвлөсөн байна. Тодруулбал, уг өдрийг угтаж гурван сарын хугацаатай аян зохион байгуулсан ба Гуравдугаар сарын 22-ноос зургадугаар сарын 22 хүртэл Улаанбаатар хотынхоо иргэд, гэрээтэй хамтран ажилладаг байгууллагууддаа чиглэсэн үйл ажиллагааг сурталчлах ажил хийх ажээ.
Мөн орон сууцны ашиглалт үйлчилгээг хариуцсан тусгай зөвшөөрөл эзэмшигч нартай хамтран хэрэглэгч нарт усны тэгш хэрэглээ, усны тэгш үйлчилгээ, суултуур хогийн сав биш гэх мэт сэдвээр үйл ажиллагаа зохион байгуулах, мөн гэрээт хэрэглэгчдэд байгууллагаас шинээр гаргасан цахим үйлчилгээг сурталчилан таниулах, сэтгэл ханамжийн судалгаа авах гэх зэрэг олон ажлыг хийнэ. Дэлхийн усны өдрийг тэмдэглэх нь цэвэр усны нөөцийг хамгаалах, усны үнэ цэн, зүй зохистой хэрэглээг олон нийтэд ойлгуулах, усны аюулгүй байдал, ашиглалттай холбоотой тулгамдсан асуудлыг шийдвэрлэх ач холбогдолтой юм .
