Улаанбаатар хотод НҮБ-ын Цөлжилттэй тэмцэх конвенцын талуудын 17 дугаар бага хурал болоход 6 хоног үлдээд байна. Олон улсын энэхүү бага хурал наймдугаар сарын 17-28-ны өдөр болно. Хурал болох гол байршил нь Үндэсний цэцэрлэгт хүрээлэн бөгөөд үүнтэй холбоотойгоор Нарны зам, Нарантуул зах, Өгөөмөр, Дүнжингарав зэрэг чиглэлийн авто замыг хэсэгчилж хаах, нийтийн тээврийн эргэлтийг нэмэгдүүлж, хувийн тээврийн хэрэгслийг хязгаартай зорчуулахаар болжээ. Нийслэлийн замын хөдөлгөөний удирдлагын газраас COP17 болох 12 хоногийн хугацаанд замын хөдөлгөөнд ямар өөрчлөлт орох талаар дэлгэрэнгүй мэдээлэл өглөө.
Нийслэлийн замын хөдөлгөөний удирдлагын төвийн хэлтсийн дарга Н.Намуу: Энэхүү олон улсын хурал болох байршил маань зах худалдааны төвүүдтэй ойр, мөн хичээлийн шинэ жилийн бэлтгэл үетэй давхцаж байгаа учраас Улаанбаатар хотод наймдугаар сарын 15-наас есдүгээр сарын 12 хүртэл авто машины улсын дугаарын тэгш, сондгойгоор хөдөлгөөнд оролцохоор болсон. Харин есдүгээр сарын 1-нд дугаарын хязгаарлалт үйлчлэхгүй, бүх тээврийн хэрэгсэл хөдөлгөөнд оролцоно. Мөн дугаарын хязгаарлалтад цахилгаан тээврийн хэрэгсэл, хүнсний бүтээгдэхүүний тээвэрлэлт, сургууль цэцэрлэгийн ажилчдын автобус, хэвлэл мэдээллийн байгууллага, дипломат төлөөлөгчдийн гадаад улсын байгууллага, хот нийтийн тээвэр, буяны ажиллагаа зэрэг тээврийн хэрэгслүүд багтахгүй бөгөөд үйлчлэхгүй.
Тэгш, сондгойн хязгаарлалтын цагийг 07.00-21.00 цаг болгож өргөтгөсөн, мөн бүсчлэхгүйгээр 160 телекамераар хязгаарлалтыг хянаж, холбогдох арга хэмжээг авна.
COP17 болох байршилтай ойролцоо дараах авто зогсоолуудыг хаана. Үүнд:
Тухайн худалдааны төвүүдэд хичээлийн шинэ жил болохтой холбогдуулан эрэлт ихэсдэг. Тиймээс замын хөдөлгөөний ачааллыг багасгах зорилгоор автомашины зогсоолыг хаана. Үүнтэй холбоотойгоор бүсийн зохион байгуулалтын ажлууд хийгдэнэ.
-
Улаан бүс буюу нийтийн тээврийн чиглэлд Ч:30, М:5 дээр нэмээд богино эргэлтийн хоёр маршрутыг төлөвлөж, иргэдэд илүү хүртээмжтэй байлгах үүднээс Нарны зам дагуу нийтийн тээврээр үйлчлүүлэх шинээр зогсоол гаргаж ажиллаж байна.
-
Шар бүс гаргаж, тухайн захуудад худалдаа, ажил үйлчилгээ явуулдаг иргэн, аж ахуйн нэгжийн бараа татан авалтыг хийх атомашины зогсоол бэлтгэж байна. Гэхдээ энэ зогсоол нь шөнийн цагаар буюу 21.00-07.00 цаг хүртэл бараа түгээлт, татан авалтаа хийх байршил юм.
Дээрх бүсчлэлийн тэмдэглэгээ Нарантуул, Дүнжингаравт худалдааны төв дээр адилхан хийгдэх юм. Дүнжингарав чиглэлд Ч:44, Ч:49 Ч:51, Ч:71, М:6 дээр богино эргэлтийн хоёр нийтийн тээврийн хэрэгсэл төлөвлөж, зогсоолыг нэмэгдүүлэхээр ажиллаж байна.
Тиймээс дээрх чиглэлд иргэд хувийн автомашинтайгаар зорчихгүй, нийтийн тээвэр болон явганаар зорчихыг уриалж байна.
-
Өгөөмөр захын зүүн урд талын нүхэн гарцаас Нарантуулын уулзвар хүртэл,
-
Нарантуулын уулзвараас урагшаа төмөр замын гарц даваад Дүнжингаравын зүүн урд талын уулзвар хүртэл
-
Дүнжингаравын зүүн урд талын уулзвараас Зүүнжанжингийн уулзвар хүртэлх замыг өглөө 07.00-21.00 цаг хүртэл хаана.
Эдгээр бүсэд нийтийн тээвэр, яаралтай дуудлагын 101, 102, 103 төвийнхөн, мөн тухайн бүсэд ажиллаж амьдагдаг иргэдийн бүртгэлийг үндэслэн тээврийн хэрэгслийг нь хэвийн зорчуулна. Бусад тээврийн хэрэгслүүд зорчихгүй.
Гудамж, зам дагуух дараах авто зогсоолыг хаана:
-
Зүүн дөрвөн замаас Нарантуулын уулзвар
-
Замын цагдаагийн баруун урд уулзвараас Нарантуулын уулзвар
-
Чулуун-Овооны тойргоос Нарантуулын уулзвар
-
Дүнжингарав худалдааны төв, Их Монголын уулзвараас Нарантуулын уулзвар
-
Хоум плазагийн уулзвараас Баянмонгол хорооллын урд талын зам дагуу Дүнжингаравын зүүн урд талын уулзвар хүртэл зам дагуух авто зогсоолыг хаана.
Одоогоор COP17-д оролцохоор 6000 орчим хүн бүртгүүлээд байгаа. Эдгээр төлөөлөгчдийг Чингис хаан олон улсын нисэх буудлаас COP17-ийн үндсэн 36 буудал руу тусгай захиалгат 60 гаруй гаруй автобусыг таван чиглэлээр гаргажээ. Энэ үйлчилгээ нь наймдугаар сарын 14-31 хүртэл цаг тутам автобус гарах ажээ.
