Цаг уур, орчны шинжилгээний газрын цаг агаарын инженер Э.Энхсүлдээс ирэх наймдугаар сарын цаг агаарын төлөвийн талаар тодрууллаа. Тэрбээр, баруун аймгуудын нутгаар агаарын дундаж температур олон жилийн дунджаас дулаан, хур тунадас дунджийн орчим байна. Хоёрдугаар арав хоног болон гуравдугаар арав хоногийн эхний хагаст ихэнх нутгаар агаарын температур олон жилийн дунджаас 1-3 хэмээр дулаарч, зарим өдөр 30 хэм давж халах төлөвтэй байна. Харин нэгдүгээр арав хоногийн эхэн болон сүүлээр, гуравдугаар арав хоногийн төгсгөлөөр сэрүүсэхээр байна. Мөн нэгдүгээр арав хоногийн ихэнх хугацаанд бороо орж, зарим газраар дуу цахилгаантай аадар бороо орно. Борооны өмнө салхи түр зуур ширүүсч, нөөлөг салхи ажиглагдах магадлалтай байна. Төвийн аймгуудын хувьд Сэлэнгийн зүүн, Төв аймгийн зүүн хойд хэсгээр агаарын температур олон жилийн дунджийн орчим, бусад нутгаар дунджаас дулаан байх төлөвтэй. Харин хур тунадас Сэлэнгэ, Төв аймаг болон Булганы зүүн хэсгээр олон жилийн дунджаас ахиу, бусад нутгаар дунджийн хэмжээнд орно.
Нэгдүгээр арав хоногийн ихэнх хугацаанд болон хоёрдугаар арав хоногийн эхээр бороо, аадар бороо орж, салхи түр зуур ширүүсэх төлөвтэй байна.
Зүүн аймгуудад агаарын температур олон жилийн дунджийн орчим байх боловч хур тунадас нийт нутгаар дунджаас ахиу орох төлөвтэй. Нэгдүгээр болон хоёрдугаар арав хоногийн зарим үед ихэнх нутгаар дуу цахилгаантай аадар бороо орж, нөөлөг салхи ажиглагдах эрсдэлтэй байна. Харин говийн аймгуудад агаарын температур нийт нутгаар дунджаас дулаан байх бөгөөд Дундговь, Дорноговь аймгийн хойд хэсгээр хур тунадас олон жилийн дунджаас ахиу, бусад нутгаар дунджийн орчим орох төлөвтэй байна. Нэгдүгээр арав хоногийн дунд болон сүүл, хоёрдугаар арав хоногийн төгсгөлөөр дуу цахилгаантай аадар бороо орж, борооны өмнө салхи түр зуур ширүүсэх магадлалтай.
Сарын эхээр баруун аймгуудын нутгаар сэрүүн байх боловч цаашдаа ихэнх нутгаар дулаан байх төлөвтэй байгаа. Ерөнхийдөө наймдугаар сард агаарын дундаж температур ихэнх нутгаар олон жилийн дунджаас дулаан байх төлөвтэй байна.
Хур тунадас зүүн аймгуудын нутаг, Төвийн аймгуудын зүүн хэсэг, Говийн аймгуудын хойд хэсгээр олон жилийн дунджаас ахиу орох төлөвтэй байна. Агаарын температур нэмэгдэж, халуун өдрийн давтамж ихсэх хандлагатай байгаа тул иргэд эрүүл мэнддээ анхаарч, наршилтаас сэргийлэхийг зөвлөж байна. Иймд иргэд, малчид, тээвэрчид цаг агаарын урьдчилсан болон сэрэмжлүүлэх мэдээг тогтмол авч, аадар бороо, хүчтэй салхи, ,гал түймэр, үер усны болзошгүй эрсдэлээс урьдчилан сэргийлэхийг анхааруулж байна" гэв.
