Монгол Улсын Ерөнхий сайд Н.Учрал УИХ-д яаралтай горимоор өргөн мэдүүлсэн Нийгмийн даатгалын ерөнхий хуульд оруулах нэмэлт өөрчлөлтийн тухай хууль УИХ-ын нэгдсэн чуулганы 2026 оны долдугаар сарны 2-ны өдрийн хуралдаанаар батлагдлаа.
Энэхүү нэмэлт, өөрчлөлтөөр даатгуулагч шимтгэлийнхээ 1 хувийг сайн дураар хуримтлуулах, улсаас 50 хувийн урамшуулал авах, үлдэгдлийг өв залгамжлагчид нь өвлүүлэх тэтгэврийн мөнгөн хуримтлалын тогтолцоог бүрдүүлсэн. Мөн ажил эрхэлдэг 15-24 насны суралцагчдыг өөрийн хүсэлтээр шимтгэлээс чөлөөлөн 26 нас хүрэхээсээ өмнө нөхөн төлөх уян хатан нөхцөлийг нээж өгсөн байна. Хөдөлмөрийн гэрээтэй иргэн хажуугаар нь ажил гүйцэтгэх, хөлсөөр ажиллах гэрээ байгуулсан бол давхар шимтгэл төлөхгүй байх сонголтыг мөн олгожээ.
Үүнээс гадна 5-аас ихгүй ажилтантай ажил олгогчийн гурав хүртэлх ажилтны шимтгэлийг 36 сар, хөгжлийн бэрхшээлтэй бол 60 сар хүртэлх хугацаанд чөлөөлж жижиг бизнесийг дэмжихээр зохицуулсан байна. Ажил олгогчийн санхүүгийн ачааллыг хөнгөлөх үүднээс үйлдвэрлэлийн ослын даатгалын шимтгэлийг эрсдэлийн зэргээс хамаарч 0.3 хувь, 1.2 хувь, 2.2 хувь болгон тус тус бууруулж, нийгмийн даатгалд анх удаа даатгуулж буй иргэдийн тэтгэврийн шимтгэлийг хөдөлмөрийн хөлсний доод хэмжээнээс 50 хувиар тооцон 24 сар хүртэлх хугацаанд чөлөөлөхөөр тусгажээ. Ингэснээр нийгмийн даатгалын тогтолцоонд “шударга” зарчим нэвтрүүлж олон жил НДШ төлсөн хүн нь өндөр тэтгэвэр авдаг болно.
Нийгмийн даатгалын тогтолцоо гурван тулгуурт болж, ирээдүйд тэтгэвэр авах иргэдийн эрх зүйн орчин сайжирч, одоо тэтгэвэр авч буй ахмадуудын тэтгэвэр 2027 оны нэгдүгээр сараас 100-300 мянган төгрөгөөр нэмэгдэх боломж бүрдэв.
