Улсын дээд шүүхийн нийт шүүгчдийн хуралдаан /2026.06.22/ болж, улс төрийн найман намыг Улсын дээд шүүхийн бүртгэлгүйд тооцжээ. Монголын Либерал нам, Монголын эмэгтэйчүүдийн үндэсний нэгдсэн нам, Ард түмний нам, Хамуг Монголын Хөдөлмөрийн нам, Монгол шинэчлэлт нам, ШИНЭ нам, Зүй ёс нам, Ардчилал шинэчлэлийн намыг Улсын дээд шүүхэд бүртгэлгүйд тооцохоор болжээ.
Улсын дээд шүүхийн Ерөнхий шүүгчийн /2026.03.31/ 34 дүгээр захирамжаар байгуулагдсан ажлын хэсгийн дүгнэлтийг хэлэлцээд Монгол Улсын дээд шүүхэд бүртгэлтэй улс төрийн намын жагсаалтыг шинэчлэн батлах, дээрх жагсаалтад бүртгэгдээгүй Улс төрийн намын тухай хууль /Шинэчилсэн найруулга/-ийг дагаж мөрдөх журмын тухай хуулийн 2 дугаар зүйлд заасан хугацаа /2025 оны 12 дугаар сарын 31/-ны дотор намын дүрмээ хуульд нийцүүлэн шинэчлэн бүртгүүлэх өргөдөл ирүүлээгүй учраас ийнхүү намын бүртгэлийг хүчингүй тооцохоор болсон байна.
Улсын дээд шүүхэд бүртгэлтэй нийт 38 нам бий. Эдгээр намууд хуульд заасан хугацаанд намын дүрмээ хуульд нийцүүлэн шинэчлэх бүртгүүлэх учиртай ч дээрх найман нам хуульд заасан хугацаандаа намын дүрмээ бүртгүүлээгүй байна.
УЛСЫН ДЭЭД ШҮҮХЭД НИЙТ 30 НАМ БҮРТГЭЛТЭЙ БОЛОВ
Улсын дээд шүүхэд бүртгэлтэй намууд: /Улаанаар тэмдэглэсэн намуудыг УДШ-ийн бүртгэлээс хассан/
- Монгол Ардын нам /МАН/-дарга нь Ерөнхий сайд Н.Учрал
- Ардчилсан нам /АН/-дарга нь УИХ-ын гишүүн О.Цогтгэрэл
- Монголын Ногоон нам /МНН/-дарга нь УИХ-ын гишүүн А.Ундраа
- Иргэний зориг ногоон нам /ИЗНН/-дарга нь УИХ-ын гишүүн Б.Батбаатар
- Монголын Уламжлалын Нэгдсэн нам /МУНН/-дарга нь Б.Батболд
- Монгол Либерал Ардчилсан нам /МЛАН/-дарга нь УИХ-ын гишүүн Д.Пүрэвдаваа
- Эх Орон нам /ЭОН/-дарга нь Б.Эрдэнэбат /эрэл групп/
- Монголын Либерал нам /МЛН/-дарга нь Э.Оргил
- Бүгд найрамдах нам /БНН/-дарга нь Б.Жаргалсайхан
- Монголын Эмэгтэйчүүдийн Үндэсний Нам /МЭҮН/
- Монголын Социал Демократ Нам-дарга нь А.Ганбаатар
- Ард Түмний Нам /АТН/-дарга нь Н.Наранцогт
- Монгол Үндэсний Ардчилсан Нам /МҮАН/-дарга нь Б.Цогтгэрэл
- Эрх Чөлөөг Хэрэгжүүлэгч Нам /Эрх чөлөөний нам болгож нэрээ өөрчилсөн/-дарга нь Ш.Төмөрсүх
- Иргэний Хөдөлгөөний Нам /ИХН/-дарга нь Ө.Баяраа
- Хөгжлийн Хөтөлбөрийн Нам-дарга нь О.Заяа
- Монголын Ардчилсан Хөдөлгөөний Нам-дарга нь А.Бат-Итгэлт
- Хамуг Монголын Хөдөлмөрийн нам /ХМХН/-дарга нь Ц.Шинэбаяр
- Хөдөлмөрийн үндэсний нам /ХҮН/-дарга нь УИХ-ын гишүүн Т.Доржханд
- Эх орончдын нэгдсэн нам /ЭОНН/-дарга нь Г.Ганбат
- Монгол Консерватив нам /МКН/-дарга нь Н.Дашдаваа
- Тусгаар тогтнол, эв нэгдлийн нам /ТТЭНН/-дарга нь Ц.Баянбилэг
- Ард түмний хүч нам-дарга нь Л.Гүндалай
- Монголын хүний төлөө нам-дарга нь Х.Бат-Ялалт
- Үнэн ба зөв нам ҮБЗН-дарга нь А.Отгонбаатар
- Эрх чөлөөний эвсэл нам /ЭЧЭН/-дарга нь Э.Одбаяр
- Дэлхийн монголчуудын нам /ДМН/-Г.Тэмүүжин
- Ард түмний олонхийн засаглал нам /АТОЗН/-дарга нь А.Батдорж
- Их эв нам-дарга нь З.Бат-Отгон
- Гэр хороолол хөгжлийн нам /ГХХН/-дарга нь Б.Батсүх
- Миний Монгол нам /ММН/-дарга нь Ж.Бат-Ирээдүй
- Монгол шинэчлэлт нам /МШН/-дарга нь Н.Жамсран
- Шинэ нам /ШН/-дарга нь Ц.Гантулга
- Зүй ёсны нам /ЗЁН/-дарга нь Б.Насанбилэг
- Ардчилал шинэчлэлийн нам-дарга нь Э.Бямбацэрэн
- Иргэдийн оролцооны нэгдэл нам /ИОНН/-намын дарга нь Ц.Оюунгэрэл
- Сайн ардчилсан иргэдийн нэгдсэн нам /САИНН/-
- Либертари нам /ЛМ/-дарга нь Э.Оргил-Эрдэнэ
Ж.БАТЗАНДАНГИЙН ҮҮСГЭН БАЙГУУЛСАН НАМ ДЭЭД ШҮҮХИЙН БҮРТГЭЛЭЭС ХАСАГДАВ
- Монголын Либерал нам нь 2014 оны нэгдүгээр сард Улсын дээд шүүхэд бүртгэгдэж, намын даргын үүрэг гүйцэтгэгчээр Б.Амгаланбаатарыг сонгож байжээ. Түүний дараа тус намын дарга нь Э.Оргил гэсэн бүртгэлтэй байна.
- Монголын эмэгтэйчүүдийн үндэсний нэгдсэн нам нь 2004 оны дөрөвдүгээр сард Улсын дээд шүүхэд бүртгүүлж, намын даргаар нь Г.Тунгалаггэрэл бүртгэлтэй байна.
- Ард түмний нам нь 2005 оны арванхоёрдугаар сард үүсгэн байгуулагдсан бөгөөд намын даргаар нь Н.Наранцогт бүртгэлтэй байна.
- Хамуг Монголын Хөдөлмөрийн нам 2011 онд үүсгэн байгуулагдаж, намын даргаар нь МАХН-ын гишүүн агсан Ц.Шинэбаяр бүртгэлтэй байна.
- Монгол шинэчлэлт нам нь 2018 оны аравдугаар сард бүртгэгдсэн бөгөөд намын даргаар нь Н.Жамсран бүртгэлтэй байна.
- ШИНЭ нам нь 2019 онд байгуулагдаж, Ардчилсан намын гишүүн Ж.Батзандан үүсгэн байгуулж байсан бөгөөд одоо намын даргаар Ц.Гантулга бүртгэлтэй байна.
- Зүй ёс нам нь 2019 онд үүсгэн байгуулагдаж, бүртгэгдсэн бөгөөд намын даргаар нь Б.Насанбилэг бүртгэлтэй байна.
- Ардчилал шинэчлэлийн нам нь 2020 оны хоёрдугаар сард Улсын дээд шүүхэд бүртгүүлсэн бөгөөд намын даргаар нь Э.Бямбацэрэн бүртгэлтэй байна.
