УИХ-ын чуулганы нэгдсэн хуралдаанаар Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг явууллаа. Төсвийн байнгын хорооны санал дүгнэлтийг УИХ-ын гишүүн Д.Энхтүвшин танилцууллаа.
УИХ-ын гишүүд үг хэлж, асуулт асууж байна.
УИХ-ын гишүүн Л.Мөнхбаясгалан:
-Энэ өөрчлөлтийг дэмжиж байгаа. Мэдээллийн технологийн салбарыг оруулж ирж байгаа нь сайн хэрэг. Мөн Олимп, тивийн наадмын спортын холбоог бас зохицуулсан. Ус хэрэглээний хэмнэлтийн технологийг нэвтрүүлсэн, усны алдагдлыг бууруулах тал дээр анхаарч, экологийн сэдвийг хуульд тусгах боломж байгаа юу?
УИХ-ын гишүүн Х.Ганхуяг:
-ААНОАТ-ын 22.9.1 заалтад энэ тухай тусгасан. Дагаж мөрдөх журмыг БОУАӨЯ-наас баталдаг юм. Орон нутгийн компаниуд нь нийгмийн хариуцлагын хүрээнд нөхөн сэргээлтээ хийдэг байх зорилгоор энэ заалтыг тусгаж, журмаар зохицуулж байгаа юм.
БОУАӨ-ийн сайд Ц.Сандаг-Очир:
-Бид Уур амьсгалын тухай анхдагч хуулийн төслийг хэлэлцэж байгаа. Маргааш эхний хэлэлцүүлгээ хийнэ. Энэ хуульд компаниуд байгаль орчинд ээлтэй үйл ажиллагаа явуулбал нэг хувийн татварын хөнгөлөлт үзүүлнэ.
УИХ-ын дарга С.Бямбацогт:
-Бид 2024 оны наймдугаар сард боловсрол, эрүүл мэнд, соёл урлаг, спорт, байгаль орчины чиглэлээр үйл ажиллагаа явуулж байгаа ААН-үүд нийгмийн хариуцлагын хүрээнд хийсэн дэмжлэг туслалцаанд татварын нэг хувийн хөнгөлөлт үзүүлэх хууль батлагдсан. Одоо бараг хоёр жил болж байна. УИХ-ын баталсан хууль хэрэгжихгүй байна. Засгийн газар дургүйд хүчгүй хандаж байна. Энийг 14 хоногийн өмнө волейболын холбооны удирдлагуудтай уулзаж байхад "Та нарын баталсан хууль амьдрал дээр хэрэгжихгүй байна. Сагс, волейболын лигт тоглож байгаа тамирчид өнөөдрийг хүртэл урамшуулал, хөнгөлөлтөө авч чадахгүй байна" гэдгийг хэлж байна. Асуудал хаана байгааг шалгахаар салбар яамд журмаа татварын албатай нийцүүлж баталдаггүй гэдэг шалтгаан хэлж байна. Одоогийн байдлаар 300-гаад ААН, 100 гаруй тэрбум төгрөгийн хөнгөлөлт эдлэх гээд хүлээгдэж байна. Сангийн яам, ТЕГ ойрын үед шийднэ шүү. УИХ-ын Тамгын газраа анхаарч энэ сардаа багтаан тайлагнаарай.
УИХ-ын гишүүн М.Мандхай:
-Монголд Улсад жилдээ 1.8 сая даатгалын гэрээг иргэн, ААН байгууллагууд хийдэг. Үүний 338 мянга нь ААН байгууллага байгаа. Энэ нөхцөлийг харвал, Монголд үйл ажиллагаа явуулж байгаа ААН-үүд аливаа эрсдэлийг өөрөө даван туулж байна. Тийм учраас даатгалын тогтолцоо тав дахин бага байна. Бусад орлогын талаарх татварын зохицуулалтад "Даатгалын нөхөн төлбөрт татвар ногдуулна" гэж заасан. Ямар хэмжээний орлого бүрдүүлээд байна вэ?
УИХ-ын гишүүн Х.Ганхуяг:
-Гамшгийн даатгалын хуулийг Сангийн яам болон ОБЕГ-тай хамтран санаачилж байгаа. Хараахан өргөн баригдаагүй байна. Ингэснээр хохирогч нарт мөнгө өгдөг асуудлыг шийдэх боломжтой. Хамгийн гол нь авлигын асуудал байна. Чанаргүй материалаар барилга барьж, комисс нь хүлээж авдаг. Энэ асуудлыг Гамшгийн даатгалын хуулиар шийдэх боломжтой юм билээ.
УИХ-ын гишүүн О.Саранчулуун:
-Жилд дунджаар хэдэн ААН-ийн дансыг хааж, үл маргах журмаар татварын орлогоос суутган авсан тоогоо гаргаж өгөөч. Дампуурсан ААН-үүдийн цаана ямар нийгэм хүн ам зүйн асуудал байсан юм бол?
УИХ-ын гишүүн Х.Ганхуяг:
-ЖДҮ-ийн хуультай уялдуулах байдлаар нэг хувийн татварыг 2.5 тэрбум төгрөгийн борлуулалттай ААН дээр ногдуулахаар хуулийн өөрчлөлтийг хийж байгаа. Мөн НӨАТ-ын төлөх хугацааг хоёр сарын хугацаагаар хойшлуулна.
