АНУ-ын ерөнхийлөгч Дональд Трампын БНХАУ-д хийж буй албан ёсны айлчлал үргэлжилж байна. Хоёр орны удирагч нар олон улсын худалдаа, дэлхийн мөргөлдөөн, Тайвань болон хиймэл оюуны асуудлыг хэлэлцсэн чухал дээд хэмжээний уулзалт хийсэн байна. Пүрэв гарагт Тяньаньмэнь талбайд байрлах Ардын их танхимд Ши Жиньпин Трамп болон түүний төлөөлөгчдийг хүндэтгэлтэйгээр хүлээн авч уулзсан. Эл үеэр хүүхдүүд АНУ болон Хятадын төрийн далбааг намируулж, Хятадын цэргийн үлээвэр найрал хөгжим тоглолт үзүүлсэн байна. Ёслолын дараа Трамп болон Ши Жиньпин нар Хятадын парламентын ордонд нүүр тулсан хэлэлцээ хийжээ.
Мөн 2026 онд АНУ тусгаар тогтнолоо зарласны 250 жилийн ой тохиож байгаад мэнд хүргэсэн байна. Трамп Ши Жиньпинийг “агуу удирдагч” хэмээн магтаж, тэд олон жилийн турш бие биенээ мэддэг байсан гэж хэлсэн байна. Эх сурвалжуудын мэдээлснээр, талууд Ойрхи Дорнодын мөргөлдөөн, АНУ болон Хятадын худалдааны дайн, Тайванийн асуудал, "AI"-ийн өрсөлдөөн зэрэг сэдвээр хэлэлцэхээр төлөвлөсөн байсан.
Дональд Трамп Иранд цохилт өгч, тус улсын удирдагчдыг устгах тушаал буулгасан нь АНУ болон Хятадын харилцаанд тодорхой хэмжээнд сөргөөр нөлөөлсөн билээ. Тиймээс энэ удаагийн уулзалтын гол сэдэв нь Ираны асуудал байх болно. Иран нь Хятадтай ойр харилцаатай орон бөгөөд Ойрхи Дорнодын мөргөлдөөн нь дэлхийн эрчим хүчний нийлүүлэлтэд эрсдэл үүсгэсэн. АНУ-ын төрийн нарийн бичгийн дарга Марко Рубио "Air Force One" онгоцоор Бээжин руу нисч байхдаа сэтгүүлчдэд "АНУ Хятадаас Ираны асуудалд илүү идэвхтэй оролцохыг хүсэх болно" гэж мэдэгджээ. Тэрбээр мөн "Хятад бол АНУ-ын хамгийн том геополитикийн сорилт бөгөөд хамгийн чухал харилцаа” гэж онцолсон байна.
