НҮБ-ын Ерөнхий нарийн бичгийн даргын хэвлэлийн төлөөлөгч Stéphane Dujarric дөрөвдүгээр сарын 6-ны өдөр мэдэгдэл хийхдээ АНУ-ын Ерөнхийлөгч Доналд Трамп Ираны иргэний дэд бүтцэд агаараас цохилт өгөхөөр сүрдүүлсэн мэдэгдэлд гүнээ цочирдсоноо илэрхийллээ.
Тэрбээр Ираны цахилгаан станц, гүүр болон бусад иргэний зориулалттай байгууламжуудыг онилох аливаа халдлага нь олон улсын хууль тогтоомжийг ноцтой зөрчих эрсдэлтэйг онцлон анхааруулсан байна.
Мөн тэрээр мэдэгдэлдээ, зэвсэгт мөргөлдөөний үед ч иргэний дэд бүтэц нь олон улсын хүмүүнлэгийн хуулиар хамгаалагдсан байдгийг дахин санууллаа. Тэрбээр, иргэний зориулалттай объектод чиглэсэн халдлага нь олон улсын эрх зүйн ноцтой зөрчилд тооцогдоно хэмээн онцлов.
Сүүлийн өдрүүдэд Иран болон АНУ-ын харилцаа эрс хурцдаж, цэргийн шинжтэй мэдэгдлүүд олноор гарч байна. Доналд Трамп Ираны стратегийн объектуудыг онилох талаар анхааруулсан нь олон улсын анхаарлыг татаж байна.
Шинжээчдийн үзэж буйгаар ийм мэдэгдлүүд нь бүс нутгийн тогтворгүй байдлыг нэмэгдүүлж, зөрчилдөөн өргөжих эрсдэлийг дагуулж болзошгүй байна.
Иймээс НҮБ-ын зүгээс талуудыг хурцадмал байдлыг намжаах, асуудлыг энхийн замаар шийдвэрлэхийг уриалжээ. Мөн аливаа цэргийн ажиллагаа явуулахдаа олон улсын хууль, тэр дундаа хүмүүнлэгийн эрх зүйг чанд мөрдөх шаардлагатайг дахин онцолсон байна.
НҮБ-ын байр суурь нь иргэний дэд бүтцэд чиглэсэн аливаа халдлага олон улсын эрх зүйд харш гэдгийг дахин тодотгож байна.
