Өмнөд Солонгосын барилгын салбарын тэргүүлэгч компани болох Booyoung Group ажилчдаа хүүхэд төрүүлсэн тохиолдолд 100 сая вон (ойролцоогоор 75 мянган ам.доллар)-ын урамшуулал олгох бодлого хэрэгжүүлж эхэлснээ зарлалаа.
Тус шийдвэр нь хүн амын төрөлт эрчимтэй буурч буй Өмнөд Солонгосын нөхцөл байдалтай шууд холбоотой юм. Сүүлийн жилүүдэд тус улсын төрөлтийн түвшин дэлхийд хамгийн доогуурт тооцогдох болсон бөгөөд энэ нь эдийн засаг, хөдөлмөрийн зах зээлд урт хугацааны сөрөг нөлөө үзүүлэх эрсдэлтэй гэж үзэж байна.
Booyoung Group-ийн зүгээс энэхүү урамшууллыг ажилчдынхаа гэр бүл төлөвлөлтийг дэмжих, хүүхэд төрүүлэхэд тулгардаг санхүүгийн дарамтыг бууруулах зорилгоор хэрэгжүүлж байгаа аж. Тус компанийн удирдлагууд “төрөлтийг нэмэгдүүлэх нь зөвхөн төрийн бодлогоор хязгаарлагдахгүй, хувийн хэвшлийн оролцоо ч чухал” хэмээн онцолжээ.
Энэхүү бодлого нь олон нийтийн анхаарлыг татаж, зарим шинжээчид үүнийг компаниуд нийгмийн хариуцлагын хүрээнд хүн амын бууралтыг сааруулахад хувь нэмэр оруулж буй жишиг алхам гэж үнэлж байна. Харин нөгөө хэсэг нь ийм өндөр мөнгөн урамшуулал нь бодит үр дүнд хүрэх эсэхэд эргэлзэж буйгаа илэрхийлжээ.
Ямартай ч Booyoung Group-ийн энэхүү шийдвэр нь төрөлтийг дэмжих шинэ арга замуудыг эрэлхийлж буй Өмнөд Солонгосын нийгэмд томоохон хэлэлцүүлэг өрнүүлэхэд хүргээд байна.
