Уганда улсын Кампала хотод байрлах нэгэн цэцэрлэгт халдлага гарч, дөрвөн бага насны хүүхэд амиа алдсан харамсалтай хэрэг гарлаа.
Албаны мэдээллээр, сэжигтэн этгээд цэцэрлэгийн орчинд эцэг эхийн дүр эсгэн нэвтэрч, эхлээд захиргааны өрөөнд орсон байна. Улмаар гадагш гарч, хаалгыг түгжсэний дараа хүүхдүүд рүү хутга барин дайрч, эмгэнэлт халдлага үйлджээ.
Халдлагын улмаас дөрвөн хүүхэд газар дээрээ нас барсан байна. Гэрчүүдийн мэдээлснээр, сэжигтэн хүүхдүүд рүү ямар ч шалтгаангүй довтолсон бөгөөд түүнийг ойролцоох хамгаалалтын ажилтан саатуулж чаджээ.
Цагдаагийн байгууллага сэжигтнийг баривчилсан ч халдлагын шалтгаан одоогоор тодорхойгүй байгаа бөгөөд мөрдөн шалгах ажиллагаа үргэлжилж байна.
Хэрэг гарсны дараа эцэг эхчүүд олноор цугларч, бухимдсан иргэд сэжигтнийг өөрсдөө шийтгэхийг оролдсон тул цагдаа нар агаарт анхааруулах буудлага хийж тараасан байна. Мэргэжилтнүүдийн үзэж буйгаар, ийм төрлийн халдлага нь тус хотод тун ховор тохиолддог бөгөөд сургуулийн өмнөх боловсролын байгууллагуудын аюулгүй байдлыг сайжруулах шаардлагатай байгааг энэ хэрэг дахин харууллаа.
