Япон улс ашигласан бохир живхийг дахин боловсруулж, дахин бүтээгдэхүүн болгон ашиглах шинэ технологийг амжилттай нэвтрүүлжээ.
Тус технологи нь жил бүр их хэмжээгээр хаягддаг живхийг байгаль орчинд сөрөг нөлөө багатайгаар боловсруулж, дахин ашиглах боломж бүрдүүлж байна . Өмнө нь ихэнх живхийг шатаах эсвэл булшлах аргаар устгадаг байсан бол шинэ шийдэл нь тэдгээрийг түүхий эд болгон хувиргах боломжийг нээжээ.
Үүний тулд эхлээд ашигласан живхийг цуглуулж, өндөр даралтын уураар ариутган, доторх целлюлоз, хуванцар болон шингээгч материалыг ялган авах зарчмаар явагддаг байна. Ингэснээр гаргаж авсан материалыг дахин боловсруулж шинэ живх, барилгын материал зэрэг төрөл бүрийн бүтээгдэхүүн үйлдвэрлэх боломжтой болжээ.
Мэргэжилтнүүдийн үзэж байгаагаар энэхүү технологи нь хог хаягдлын хэмжээг бууруулахаас гадна нүүрсхүчлийн хий ялгарлыг мэдэгдэхүйц багасгах ач холбогдолтой юм. Ялангуяа хүн амын насжилт өндөртэй Япон улсад ахмад настны живхний хэрэглээ нэмэгдэж буй энэ үед уг шийдэл нь ирээдүйн томоохон асуудлыг шийдвэрлэх чухал алхам болж байна.
Японы эрх баригчид цаашид уг системийг өргөжүүлж, 2030 он гэхэд орон даяар нэвтрүүлэх зорилт тавьжээ.
Ийнхүү Япон улс хог хаягдлыг дахин ашиглах шинэ арга нэвтрүүлснээр байгаль орчныг хамгаалах чиглэлд дэлхийд үлгэр жишээ болохуйц том алхам хийлээ.
