АНУ Ирантай гал зогсоох хэлэлцээр хийхээр төлөвлөж байгаа тухай АНУ-ын талаас мэдээллээ.
АНУ-ын хэвлэл мэдээллийн хэрэгслүүдийн 24-ний өдрийн мэдээлснээр, АНУ Иранд мөргөлдөөнийг зогсоох зорилготой 15 зүйл бүхий төлөвлөгөөг гардуулж өгсөн байна. Мөн өдөр Израилийн хэвлэл мэдээллийн хэрэгслүүд АНУ Ирантай төлөвлөгөөгөө хэлэлцэхийн тулд нэг сарын хугацаатай гал зогсоохоор төлөвлөж байна гэж мэдээлэв. АНУ Ирантай хурдхан хэлэлцээр тохиролцохыг эрэлхийлж, "чухал буулт" хийх магадлалтай хэмээн Израилийн тал санаа зовниж байна гэжээ.
“Нью-Йорк Таймс” сонин албан тушаалтнуудын хэлсэн үгээс эш татаж тэмдэглэхдээ, уг төлөвлөгөөг Пакистан Иранд дамжуулсан бөгөөд Иран үүнийг хэлэлцээрийн үндэс болгон хүлээн авах эсэх, мөн Израиль түүний агуулгыг зөвшөөрөх эсэх талаар тодорхойгүй байна гэжээ.
Тус мэдээлэлд, АНУ болон Пакистан, Египет, Турк улсуудаас бүрдсэн зуучлалын хэсэг 26-ны өдөр Ирантай өндөр түвшний хэлэлцээ хийх боломжийг хэлэлцэж байгаа боловч энэ санал одоогоор "Ираны хариуг хүлээж байна" гэж мэдэгдэв.
АНУ-ын Ерөнхийлөгч Дональд Трамп “хоёр улс үр дүнтэй хэлэлцээ хийж байгаа” хэмээн мэдэгдсэн нь нөхцөл байдал зөөлрөх байх гэсэн хүлээлт үүсгээд байна.
Гэвч Ираны албаныхан уг мэдээллийг үгүйсгэж, АНУ-тай ямар нэгэн шууд хэлэлцээ явагдаагүй гэж мэдэгдлээ. Тэд мөн ийм төрлийн мэдээлэл нь олон нийтийн ойлголтод нөлөөлөх зорилготой байж болзошгүйг онцолсон байна.
Шинжээчдийн үзэж байгаагаар хоёр улсын хооронд шууд хэлэлцээ хийгдээгүй ч зуучлагч улсуудын шугамаар харилцаа үргэлжилж байх боломжтой аж. Үүний зэрэгцээ Ойрхи Дорнодын бүс нутагт геополитикийн нөхцөл байдал хэвээр хурцадмал байна.
“АНУ, Иран хэлэлцээ хийж эхэлсэн” гэх мэдээлэл нь одоогоор баталгаажаагүй бөгөөд хоёр талын байр суурь зөрүүтэй хэвээр байна.
