“ЮНИМА” Олон Улсын Хүүхэлдэйчдийн холбоо / UNIMA /-ноос 03-р сарын 21-ны өдрийг “Олон Улсын Хүүхэлдэйчдийн өдөр” болгон дэлхий нийтээр тэмдэглэдэг уламжлалтай билээ. Энэхүү өдрийг тохиолдуулан Монгол Улсын Хүүхэлдэйн театр нь “Олон Улсын Хүүхэлдэйчдийн өдөр”-т зориулсан баярын арга хэмжээг 2 дахь удаагаа зохион байгуулах гэж байна.
Тус арга хэмжээний хүрээнд: Соёл, Спорт, Аялал жуулчлал, Залуучуудын яам, ЗГХА-Соёл, урлагийн газар, Про театр, Маппет театр, Рома театр, зохиолч Н.Надмид, М.Чойжамц, зураач А.Дашдондог нарын гэр бүл, төрөл төрөгсөд болон улсын хүүхэлдэйн театрын уран бүтээлчид, улсын хүүхэлдэйн театрын ахмадууд гэсэн байгууллагууд оролцох юм.
Энэхүү арга хэмжээ нь монголын хүүхэлдэйн урлагийн түүх, уламжлал, алтан үеийн уран бүтээлчдийн бүтээлийг олон нийтэд сурталчлах, уран бүтээлчдийн харилцаа холбоог өргөжүүлэх, хүүхэд багачуудад хүүхэлдэйн урлагийг ойртуулах зорилготой юм.
2026 оны 3 дугаар сарын 18-ны өдөр
- 11:00 цагт Монгол Улсын Хүүхэлдэйн театрын фойед “Алтан үеийн хэлхээ – Хүүхэлдэйн урлаг” нэртэй үзэсгэлэнгийн нээлт болно. Энэхүү үзэсгэлэн нь Монголын хүүхэлдэйн урлагийн нэрт төлөөлөгчид болох зохиолч Н.Надмид, найруулагч М.Чойжамц, зураач А.Дашдондог нарын амьдрал, уран бүтээлийн талаарх үзэсгэлэн юм.
- 13 цагт Монгол Улсын Хүүхэлдэйн театрын тайзнаа хэвлэлийн бага хурал зохион байгуулж, Олон улсын хүүхэлдэйчдийн өдрийг тохиолдуулан хэрэгжүүлэх арга хэмжээний талаар хэвлэл мэдээллийн байгууллагуудад мэдээлэл өгнө.
2026 оны 3 дугаар сарын 21-ний өдөр
- 11:00 цагт “Wonderlust” уран бүтээлчдийн цуглаан Сүхбаатарын талбайгаас эхэлж Монгол Улсын Хүүхэлдэйн театрын гадаа талбайд үргэлжилнэ. Уг арга хэмжээнд дотоод гадаадын уран бүтээлчид оролцож, харилцан танилцах, туршлага солилцох уулзалт зохион байгуулагдана.
- 13:00 цагт Монгол Улсын Хүүхэлдэйн театрын тайзнаа “Морин хуур” хүүхэлдэйн жүжгийг 2025-2026 оны хичээлийн жилд сурлагын амжилт гарган, анги хамт олноо манлайлан суралцаж буй сурагчдад зориулан үнэ төлбөргүй тоглоно.
- 15:00 цагт театрын гадаа талбайд “Ламбе-ламбе” нэртэй жижиг хэмжээний хүүхэлдэйн үзүүлбэрүүдийг театрын уран бүтээлчид хүүхэд багачуудад зориулан толилуулна.
- 17:00 цагт Монгол Улсын Хүүхэлдэйн театрт “Алтан үеийн хэлхээ – Хүүхэлдэйн урлаг” хэлэлцүүлэг зохион байгуулагдана. Уг хэлэлцүүлгээр монголын хүүхэлдэйн театрын алтан үеийн уран бүтээлчдийн хувь нэмэр, зохиолч Н.Надмид, найруулагч М.Чойжамц, зураач А.Дашдондог нарын уран бүтээлийн онцлог, Монгол Улсын Хүүхэлдэйн театр UNIMA олон улсын байгууллагад гишүүнээр элсэж буй тухай болон хүүхэлдэйн театрын хөгжил, ирээдүйн чиг хандлагын талаар нээлттэй хэлэлцэх юм.
Монгол Улсын Хүүхэлдэйн театр нь энэхүү арга хэмжээгээр дамжуулан хүүхэлдэйн урлагийн түүх, өв уламжлалыг олон нийтэд сурталчлах, хүүхэд багачуудын урлагийн боловсролыг дэмжих, уран бүтээлчдийн хамтын ажиллагааг өргөжүүлэхийг зорьж байна.
