Америкийн поп дуучин Britney Spears-ийн хуучин нөхөр Kevin Federline өөрийн дурсамж номоо гаргахаар болсон нь олны анхаарлыг татаж байна. Бритни уг номд дурдсан зарим мэдээлэлд хариу мэдэгдэл хийж, түүнийг “хэт гуйвуулсан, сэтгэл зовоосон” гэж шүүмжилжээ.
Федерлайны “You Thought You Knew” нэртэй дурсамж номд Бритни Спирсийн хувийн амьдрал, хүүхдүүдтэй холбоотой харилцаа болон өнгөрсөн үеийн маргаантай асуудлуудын талаар өгүүлсэн байна. Номын хэсгээс олон нийтэд ил болсон зарим мэдэгдэл нь дуучны хүүхдүүдийг өсгөсөн арга барил болон түүний амьдралын хэв маягийг шүүмжилсэн агуулгатай байжээ.
Үүнтэй холбогдуулан Бритни Спирс сошиал сүлжээгээр дамжуулан байр сууриа илэрхийлж, экс нөхрөө “байнга гүтгэж, үнэнийг гуйвуулж байна” гэж мэдэгдсэн байна. Тэрээр энэ талаар “хуучин нөхрийн минь байнгын буруутгал маш их шархлуулж, туйлдуулж байна” хэмээн бичжээ.
Мөн дуучин уг номоор дамжуулан экс нь нэр хүнд, ашиг олохыг оролдож байна гэж үзэж буйгаа илэрхийлсэн байна. Түүний хэлснээр номд бичигдсэн зарим зүйлс “худал бөгөөд үүнээс ашиг хүртэж байгаа нь харамсалтай” гэжээ.
Britney Spears болон Kevin Federline нар 2004 онд гэрлэж, хоёр хүүтэй болсон ч 2007 онд салсан юм. Хосуудын харилцаа, хүүхдийн асрамжийн асуудал олон жилийн турш хэвлэл мэдээллийн анхаарлын төвд байсаар ирсэн.
Одоогоор Федерлайны номын талаар маргаан үргэлжилж байгаа бөгөөд хоёр талын байр суурь олон нийтийн дунд өргөн хэлэлцүүлэг өрнүүлж байна.
