Америк, Израилийн тал Ираны нутаг дэвсгэрт 1700 гаруй удаа цохилт өгчээ
Орон нутгийн цагаар 3-р сарын 4-ний өдрийн байдлаар, Америк болон Израиль Ираны эсрэг цэргийн халдлага явуулсны 5 дахь өдөр болж байна. Америкийн арми 3-нд мэдэгдснээр, 2-р сарын 28-нд Ираны эсрэг цохилт өгөх ажиллагаагаа эхлүүлснээс хойш, Ираны нутаг дэвсгэрт 1700 гаруй удаа цохилт өгсөн байна. Мөн өдөр Исламын хувьсгалын хамгаалагчдын корпус буюу IRGC мэдэгдэхдээ, “Үнэнч амлалт 4” хэмээх 16 дахь ээлжийн цэргийн ажиллагаагаа эхлүүлж, их хэмжээний пуужин болон дроныг ашиглан Израилийн нутаг дэвсгэрт цохилт өгөх болно гэжээ.
Ираны Гадаад хэргийн яамны хэвлэлийн төлөөлөгч Исмаил Багаей 3-нд мэдэгдэхдээ, Ираны тал сайн санааны үүднээс яриа хэлэлцээ рүү шилжихийг зорьж байгааг онцолсон бөгөөд цөмийн зэвсэг хөгжүүлэхгүй гэсэн байр сууриа олон удаа илэрхийлсэн юм. Гэхдээ Америк болон Израилийн хүчтэй халдлагад өртсөний дараа Ираны зэвсэгт хүчин болон ард түмэн энэ бүхнийг даван туулах, хүчтэй тэмцэх шийдэмгий зоригтой болсон гэлээ.
Орон нутгийн цагаар 4-ны үүрээр Исламын хувьсгалын хамгаалагчдын корпус мэдэгдэл нийтэлж, сүүлд авч буй мэдээлэл болон газар дээрх хяналтын байдлаас үзэхэд, дайн эхэлснээс хойш Израилийн армийн 680 гаруй хүн амиа алдаад байна гэжээ.
Энэхүү дайн нь Ойрхи Дорнодын олон оронд сөрөг нөлөө учруулаад байна. Орон нутгийн цагаар 3-р сарын 3-нд, Арабын Нэгдсэн Эмират улсад суугаа АНУ-ын консулын газрын ойролцоо дроны халдлагын улмаас гал гарчээ.
