Японы парламентын ээлжит бус сонгууль ням гарагт болж, тус улсын Ерөнхий сайд Санаэ Такаичигийн Либерал ардчилсан нам үнэмлэхүй ялалт байгуулав. Сонгуулийн ирц 56.23 хувьтай байсан бөгөөд энэ нь өмнөх сонгуулиас хоёр хувиар өссөн үзүүлэлт юм. "NHK"-д мэдээлснээр, Либерал ардчилсан нам 465 гишүүнтэй доод танхимд 316 суудал авч, үнэмлэхүй ялалт байгуулсан нь тодорхой боллоо.
Маргарет Тетчерийг хүндлэн биширдэг учир "Төмөр хатагтай" хэмээн нэрлэгдсэн Такаичи Японы Либерал ардчилсан намд нэгэн өнгөлөг дүр болоод буй. Тэрбээр хүйсийн тэгш эрх, цагаачлалын чанга хатуу бодлогоороо танигдсан. Такаичи өнгөрсөн аравдугаар сард албан тушаалаа авснаар сүүлийн таван жилийн дотор сонгогдож буй дөрөв дэх Ерөнхий сайд болсон юм.
Ерөнхий сайд болохоосоо өмнө тэр телевизийн хөтлөгч байсан гэдэг. Мөн хүнд метал хөгжим сонирхдог, хамтлагт тоглодог байснаараа залуусын сонирхлыг ихээхэн татсан. Санаэ Такаичи ялалт байгуулж буй сургаар зах зээл асар хурдтай хариу үйлдэл үзүүлж байна. Тодруулбал, Японы хөрөнгийн зах зээл нээгдэхтэй зэрэгцэн "Nikkei" индекс өнөө өглөөний эхэн үеийн арилжаагаар таван хувиас дээш гарч өсчээ.
