“Милан–Кортина”- 2026 Өвлийн Олимпын наадмын нээлтийн ёслол өнөөдөр болно. Нээлтэд дэлхийн хэмжээний уран бүтээлчид, жүжигчдийн оролцож урьд өмнө байгаагүй өргөн хүрээтэй нээхээр төлөвлөжээ.
Тухайлбал нээлтийн ёслолд 5 удаагийн “Grammy”-ийн шагналт дуучин Мэрайя Кэри, Golden Globe”-ийн шагналт уран бүтээлч Лаура Паусини, дэлхийд алдартай тенор дуучин Андре Бочелли, жүжигчин, продюсер Пиерфранческо Фавино нар оролцоно.
Нээлтийн ёслол Улаанбаатарын цагаар 2026 оны 2-р сарын 6-7-нд шилжих шөнө 03:00 цагт болох бөгөөд 3 цаг гаруй хугацаанд үргэлжлэх юм.
Нээлтийн ёслолыг Balich Wonder Studio продакшн Милан хотын Сан-Сиро (Жузеппе Меацца) Олимпын цэнгэлдэхэд найруулан толилуулна. Цэнгэлдэх хүрээлэн доторх сүр жавхлант шоугоос гадна хот даяар болон Олимпын бүс нутгуудад бусад арга хэмжээнүүд зэрэгцэн зохион байгуулагдах ажээ
Милан хотоос гадна Предаццо, Ливиньо, Кортина д’Ампеццо хотуудад ёслолын арга хэмжээ, тамирчдын жагсаал болно. Ингэснээр тамирчдыг тэмцээний талбайтай нь ойртуулж, үзэгчид, оршин суугчдыг өргөнөөр оролцуулах юм.
Мөн олимпын наадмын түүхэнд анх удаа хоёр Олимпын галыг асаахаар болжээ.
Тодруулбал, Милан хотод – Arco della Pace-д, Кортина д’Ампеццо хотод Piazza Dibona цэнгэлдэхэд олимпын гал мандаана.
Олимпын гал дүрэлзэх тогоонуудыг Fincantieri компанийн дэмжлэгтэйгээр, Марко Балич, Лида Кастелли, Паоло Фантин нарын хамтарсан төслөөр бүтээсэн бөгөөд:
• Леонардо да Винчигийн “зангилаа” хээ
• Нарны бэлгэдэл
• Ирээдүйд чиглэсэн тогтвортой дизайн зэргийг шингээжээ.
Олимпын гал 2-р сарын 22-нд унтарч, 3-р сарын 6-нд Паралимпийн галыг дахин асаан 3-р сарын 15 хүртэл асаалттай байх юм.
