Зүүн өмнөд Азийн математикийн олимпиадын хоёрдугаар шатны шалгаруулалт 2026 оны нэгдүгээр сарын 16–19-ний өдрүүдэд Индонезийн Бали аралд зохион байгуулагдлаа. Тус олимпиадад дэлхийн 22 орны 25 мянга гаруй сурагч оролцсон байна. Энэхүү олон улсын олимпиадад Өмнөговь аймгаас 60 гаруй сурагчийн бүрэлдэхүүнтэй баг оролцож, нэг алт, хоёр мөнгө, 10 хүрэл буюу нийт 13 медаль хүртжээ.
Тодруулбал, Өмнөговь аймгийн Даланзадгад сумын 1-р сургуулийн 3в ангийн суралцагч Д.Дөлгөөн, 8а ангийн суралцагч А.Мөнхзаяа нар мөнгөн медаль хүртсэн бол 3г ангийн суралцагч Б.Эрмүүн, 6ё ангийн суралцагч Энхжин, 7а ангийн суралцагч А.Гантөр, 8а ангийн суралцагч Ц.Бадралмаа, 11а ангийн суралцагч Б.Сүхбаяр нар хүрэл медаль тус тус хүртжээ. Харин Даланзадгад сумын 3-р сургуулийн 11а ангийн суралцагч Э.Тэргэлсаран алтан медаль, 4б ангийн суралцагч Б.Төгөлдөр, 5б ангийн суралцагч Н.Батням, 7в ангийн суралцагч М.Сэцэнбэхи, 7а ангийн суралцагч Г.Нэргүйцэцэг, 3б ангийн суралцагч Л.Отгонжаргал нар хүрэл медалийн эзэд болжээ.
Өмнөговь аймгийн Боловсролын газрын математик, мэдээллийн технологийн ахлах мэргэжилтэн С.Мандахайгаас тус олимпиадын талаар тодруулахад “Зүүн өмнөд Азийн олимпиад нь Азийн орнуудын хэмжээнд зохион байгуулагддаг. Эхний шатыг оролцогч улс бүрийн эрх бүхий байгууллага зохион байгуулдаг. Тухайн эрх бүхий байгууллагаас орон нутагт зохион байгуулах эрхийг нь авч, журмынх нь дагуу шаардлагатай шалгуурыг ханган Өмнөговь аймгийн Даланзадгад сумын ЕБ-ын 1-р сургуульд зохион байгуулсан. Улмаар сурагчдын олимпиадын материалыг үндсэн зохион байгуулагчид руу илгээж, түүнээс сарын дараа дүн нь гарсан.
Өмнө нь эхний шатанд сурагчид Улаанбаатар хот руу очиж оролцдог байсан бол энэ хичээлийн жилээс өөрийн орон нутагтаа оролцох болсноороо онцлогтой.
Тус олимпиадын эхний шатанд нийт 15 сумын 23 сургуулийн 170 гаруй хүүхэд оролцсоноос 72 нь дараагийн шатанд шалгарсан. Дараагийн шат Индонез улсын Бали арал дээр зохион байгуулагдаж, манай аймгаас 60 гаруй хүүхэд оролцож 13 сурагч алт, мөнгө, хүрэл медаль хүртсэн. Боловсролын газраас санхүүгийн дэмжлэг үзүүлэх боломжгүй учраас эхний шатанд тэнцсэн хүүхдүүд өөрсдийн зардлаар оролцсон" гэдгийг хэлэв.
