Засгийн газрын зүгээс Рио Тинто групптэй хувь нийлүүлэгчдийн зээлийн гэрээний хүү болон менежментийн төлбөрийг бууруулах, “Оюутолгой” компанийн засаглалтай холбоотой асуудлыг шийдвэрлэхээр гурван ажлын хэсэг байгуулагдан ажиллаж буй. Өнгөрөгч оны сүүлээр байгуулагдсан эл ажлын хэсгийн үйл явц ямар байгаа талаар Аж үйлдвэр, эрдэс баялгийн сайд Г.Дамдинням мэдээллээ. Тэрбээр Рио Тинтотой хийх хэлэлцээ зогсоогүй гэж мэдэгдлээ.
Тэрбээр "Хэлэлцээ идэвхтэй явж байхад УИХ-ын нээлттэй сонсгол болж, УИХ-аас Засгийн газарт чиглэл өгсөн тогтоол гарсан. Хуулийн дагуух процессоороо саяхан албажиж дуусаад ирсэн. Засгийн газраас баталсан удирдамжийг УИХ-ын тогтоолтой уялдуулж, Ажлын хэсгийг өргөх зэрэг бэлтгэл ажлууд явж байна. Удахгүй хэлэлцээ үргэлжлээд явна" гэлээ.
