Энэтхэгийн зүүн хэсэгт орших Баруун Бенгал мужид Нипа вирусын таван тохиолдол бүртгэгдэж, 100 орчим хүнийг хорио цээрийн дэглэмд хамруулжээ.
Халдвар авсан хүмүүст тус мужийн төв Колката болон ойр орчмын газруудын эмнэлгүүдэд эмчилгээ хийж байгаа бөгөөд нэг өвчтөний биеийн байдал хүнд байгаа талаар эх сурвалж мэдээллээ.
Нипа вирус нь уушиг болон тархийг гэмтээж, халуурах, толгой өвдөх, нойрмоглох, ухаан балартах, ухаан алдах зэрэг шинж тэмдгүүдийг үүсгэдэг бөгөөд халдвар авсан хүмүүсийн нас баралтын хэмжээ 40%-иас давж мэдэх талаар ДЭМБ зэрэг байгууллагууд мэдээлжээ. Халдвар авсанаас шинж тэмдэг илрэх хүртэлх нуугдмал хугацаа нь ерөнхийдөө 4-14 хоног байдаг ч 45 хоног хүртэл үргэлжилж мэдэх юм. Одоогоор Нипа вирусын эсрэг тусгай вакцин, үр дүнтэй эмчилгээ байхгүй байна.
Тайланд зэрэг улс Энэтхэгээс ирсэн агаарын зорчигчдод Нипа вирусын халдвар авсан эсэхийг шалгаж эхэлжээ. Мөн эрсдэлтэй бүс нутгаас ирж буй аялагчдад зориулан “Эрүүл мэндээс болгоомжлох карт” гаргаж, Тайландад ирэхээсээ өмнө 21 хоногийн дотор сарьсан багваахай, өвчтэй амьтан эсвэл халдвартай хүнтэй харьцсан бол халуурах, толгой өвдөх, булчин өвдөх, хоолой өвдөх, ханиалгах, амьсгалахад хэцүү болох, нойрмоглох, төөрөгдөл, таталт өгөх зэрэг шинж тэмдэг илэрвэл яаралтай эмнэлгийн тусламж авахыг зөвлөж байна.
