Эрдэнэт үйлдвэрийн Судалгаа, шинжилгээний хүрээлэн өнгөрсөн онд нийт 10.7 тэрбум төгрөгийн өртөг бүхий судалгаа, шинжилгээний ажлыг амжилттай хэрэгжүүлжээ. Тодруулбал, ашиглалтын хайгуулын 4000 тууш метр ажлын судалгаа, Оюут орд болон Баяжуулах үйлдвэрийн хэвийн, тасралтгүй үйл ажиллагааг хангахад чиглэсэн томоохон судалгаанууд хийсэн байна. Мөн “Соёолон интернэшнл”, “FLSmidth” групп, “Оюутолгой” зэрэг дотоод, гадаадын нэр хүндтэй компанийн захиалгат судалгааны ажлуудыг чанарын өндөр түвшинд хийж, үйлдвэрлэл–шинжлэх ухааны уялдаа холбоог улам бататгав.
Түүнчлэн, “Эрдэнэс Монгол” нэгдлийн бүрэлдэхүүн компаниудын мөнгөний ордын судалгаанд хамтран ажилласан нь судлаачдад зэсийн ордоор хязгаарлагдахгүй, ховор болон үнэт металлын ордуудыг судлах, мэдлэг туршлагаа тэлэх бодит боломжийг нээсэн гэж тус хүрээлэнгийн захирал Х.Оюунтунгалаг ярилаа.
Тус хүрээлэн 2026 онд залуу инженер, судлаачдаа дэлхийн дэвшилтэт технологи, шинжлэх ухааны ололтоос суралцуулах, мэргэшүүлэх, улмаар олж авсан мэдлэг, туршлагаа Эрдэнэт үйлдвэрт нутагшуулахад онцгойлон анхаарч ажиллахаар зорьж байна. Энэ хүрээнд “Жайка” олон улсын байгууллагатай хамтран хоёр судлаач инженерээ Япон Улсын “Кизуна” хөтөлбөрт хамруулжээ. Тэд баяжуулалтын бүтээгдэхүүнийг бүрэн боловсруулж, уусгах технологи, эрдсийн найрлагыг өндөр нарийвчлалтай тодорхойлох хүчин чадал бүхий анализатор багажуудыг ашигласан шинжлэх ухааны судалгаа хийж, Японы болон хүрээлэнгийн мэргэжилтнүүдтэй хамтран ажиллаж байгаа нь цаашдын судалгаа, үйлдвэрлэлд нэвтрүүлэх чухал суурь болж байна.
