Үндэсний их баяр наадмын барилдаанд Сүхбаатар аймгийн Онгон сумын харьяат аймгийн арслан Н.Өсөхбаяр үзүүрлэж улсын гарди цол хүртсэн. Улмаар баяр наадмын дараа шөвгөрсөн бөхчүүдээс допингийн шинжилгээ авахад Н.Өсөхбаяр гардиас хориотой бэлдмэл хэрэглэсэн гэх мэдээ явсан. Тэгвэл Н.Өсөхбаяр гардийн дасгалжуулагч тухайн бөхөд хориотой бэлдмэл өгсөн байж болзошгүй хэргийг Цагдаагийн байгууллага шалгаж байгаа гэж Монгол бөхийн холбооны тэргүүн Ц.Магалжав мэдээлжээ.
Н.Өсөхбаяраас хориотой допингийн бодис илэрсэн тул түүний цолыг хураах саналыг Үндэсний их баяр наадмыг зохион байгуулах хорооноос өнгөрсөн аравдугаар сард /2025.10.2/ Монгол Улсын Ерөнхийлөгчид хүргүүлсэн байна. Ингээд Н.Өсөхбаярын барилдах эрхийг дөрвөн жилээр хасаж улмаар Н.Өсөхбаярт зургаагийн даваанд өвдөг шороодсон Улсын заан М.Лхагвагэрэлд “Үнэн зоригт” долоогийн даваанд өвдөг шороодсон Улсын заан Б.Пүрэвсайханд “Хуурнин шуугигч”, наймын даваанд өвдөг шороодсон Дархан аварга Н.Батсуурьт "Тод сонин” чимгийг нөхөн олгох саналыг гаргасан байна.
Н.Өсөхбаяр өөрийгөө хорлогдсон гэж сэжиглэж байгаа учир шалгах, хянах ёстой газрууд нь шалгана. Гэхдээ нэг л зүйлийг баттай хэлж чадах нь тэрбээр эрхээ хасуулж, цолоо хураалгана. Гол нь хэдийгээр хугацаагаар хасуулах вэ гэдэг л байна. Өмнөх жишээнүүдээс харахад бараг л ирэх жилийн наадмын өмнөхөн шийдэгдэж таарах байх. Ерөнхийлөгчийн зарлигаар түүнд цол олгосон учир дахин Ерөнхийлөгчийн зарлигаар л түүний цолыг хурааж, түүнд унасан бөхчүүдэд цол, чимгийг нь нөхөн олгоно.
Улсын Гарьд Н.Өсөхбаярт унасан бөхчүүд:
- 4-ийн даваанд: Улсын харцага Г.Бадрах
- 5-ын даваанд: Улсын гарьд Б.Гончигдамба
- 6-ын даваанд: Улсын заан М.Лхагвагэрэл
- 7-ын даваанд: Улсын заан Б.Пүрэвсайхан
- 8-ын даваанд: Дархан аварга Н.Батсуурь
Харин энэ удаад Н.Өсөхбаяр гарьдад цолны даваанд унасан бөхчүүд дунд цол нэмэх бөх байхгүй, бүгд чимэг нэмж, дархан аварга Н.Батсуурийн үзүүрийн тоо нэгээр нэмэгдэнэ.
