Банкны нууц үгийг нь мэдэж авах зорилгоор “Та мөнгө хожлоо” гэсэн хуурамч мэдээлэлд иргэдийг итгүүүлж, улмаар мөнгийг нь луйварддаг тохиолдол гарсаар байгааг цагдаагийн байгууллагаас сэрэмжлүүлж байна. Тодруулбал, сүүлийн үед олон нийтийн цахим сүлжээ, тэр дундаа фэйсбүүк чатаар дамжуулан нэр бүхий банкны логотой хаягуудаас “Та мөнгө хожлоо, банкны нууц үгээ оруулж мөнгөө аваарай” гэх мэт итгэл үнэмшил өндөртэй харагдахуйц худал мэдээлэл түгээж, иргэдийг залилан мэхлэх үйлдэл нэмэгдэж байгаа ажээ.
Цагдаагийн байгууллагаас мэдээлснээр 2026 оны нэгдүгээр сарын 3-ны өдөр нэгэн иргэн дээрх агуулгатай мессежид итгэн холбогдож, илгээсэн линкээр орон дансны нууц үгээ оруулсны улмаас 3 сая 300 мянган төгрөгөө алдсан ноцтой хэрэг бүртгэгджээ. Залилан үйлдэгчид банкны албан ёсны хаяг мэт харагдах лого, бичвэр ашиглан итгэл төрүүлж, богино хугацаанд мөнгө авах боломжтой гэх сэтгэлзүйн дарамт үүсгэдэг нь иргэдийг болгоомжгүй үйлдэл хийхэд хүргэж байна.
Банк, санхүүгийн байгууллагууд нь иргэдээс нууц үг, нэг удаагийн кодыг чат, мессежээр асуудаггүй. Иймээс “та шагнал хожлоо”, “мөнгөө яаралтай авна уу” гэх агуулгатай үл таних мессеж, линк ирсэн тохиолдолд сайтар нягталж шалгах, үл мэдэх холбоос дээр дарахгүй байх, хувийн болон дансны нууц мэдээллээ ямар ч тохиолдолд бусдад дамжуулахгүй байхыг албаныхан анхааруулж байна.
