Хүний эрхийн Үндэсний Комисс, Батлан хамгаалах яамны хамтын ажиллагааны санамж бичгийн хүрээнд ХЭҮК цэргийн анги, салбарын алба хаагчийн хөдөлмөрлөх эрхийн асуудал, цалин хөлс, ажлын байр, дүрмийн бус харьцааны эрх зүйн зөрчлөөс урьдчилан сэргийлэх, харилцаа хандлага, ёс зүйн асуудалд байнгын анхаарал хандуулан ажиллаж байна.
Энэ хүрээнд Хүний эрхийн Үндэсний комиссоос 2025 оны эхний хагас жилд Зэвсэгт хүчний анги, салбаруудад хүний эрхийн сургалт, сурталчилгааны ажлуудыг үе шаттайгаар явуулж байна. Тухайлбал, Архангай, Баян-Өлгий, Баянхонгор, Дорноговь, Дундговь, Орхон, Өмнөговь, Өвөрхангай, Төв аймаг дахь ХЭҮК-ын албан хаагчид Зэвсэгт хүчний ...дугаар анги, тусгай салбаруудад ажиллаж, офицер, ахлагч, хугацаат цэргийн алба хаагч нийт 1205 хүнд хүний эрхийн сургалт сурталчилгаа, нөлөөллийн ажлыг зохион байгууллаа.
Сургалтаар “Хүний эрхийн үндсэн ойлголт”, “Үндсэн хууль ба хүний эрх”, “Хүний эрхэд суурилсан хандлага”, “Дүрмийн бус харьцаа” “Хүний хувийн мэдээлэл хамгаалал, анхаарах асуудлууд”, “Хүний эрх ба гэр бүл” сэдвээр хүний эрхийн хандлага, ойлголт мэдлэгийг нэмэгдүүлэв.
Өмнөх жилүүдэд ХЭҮК-т ирсэн хугацаат цэргийн алба хаагчидтай холбоотой гомдол мэдээлэлд, тэднийг цалин хөлс, амралтгүйгээр ажиллуулах, улирлын шинжтэй ажилд татан оролцуулж байна гэх гомдол зонхилж байсан бол 2025 оны эхний хагас жилийн байдлаар Зэвсэгт хүчний анги байгууллагуудтай холбоотой гомдол, мэдээлэл бүртгэгдээгүй байна.
