Нэгдсэн Үндэстний Байгууллагын энхийг дэмжих ажиллагаанд үүрэг гүйцэтгэхээр бэлтгэгдэж буй цагдаагийн багийн 191 алба хаагчдад хүний эрхийн сургалтыг үе шаттай зохион байгуулж байна.
Хүний эрхийн Үндэсний Комиссын гишүүн Б.Энхболд сургалтыг нээж, энхийг сахиулах ажиллагаа нь хүний эрх, энх тайван, шударга ёсыг хамгаалахад чиглэсэн чухал үйл ажиллагаа болохыг онцлон тэмдэглэв. Мөн алба хаагчид хүний эрхийн зарчим, олон улсын баримт бичгүүдийн хэрэгжилтийг ажил үүргийнхээ хүрээнд мөрдөж ажиллахын ач холбогдлыг дурдав.
Цагдаагийн байгууллага нь энэ жил анх удаа багийн бүрэлдэхүүнээр энхийг сахиулах ажиллагаанд оролцож тухайн улс орондоо цагдаагийн чиг үүргээ хэрэгжүүлэх юм.
Сургалтад “Хүний эрхийн тухай ойлголт, хүний эрхийн түгээмэл тунхаглал, олон улсын баримт бичгүүд, хүний эрх ба хууль сахиулах ажиллагаа, хүний эрхийн зөрчил, хариуцлага” зэрэг сэдвүүд багтаж байна.
Цагдаагийн байгууллагын зүгээс Хүний эрхийн Үндэсний Комисст хамтран ажиллаж буйд талархал илэрхийлж, энэхүү сургалт нь энхийг сахиулах ажиллагаанд оролцох алба хаагчдын мэдлэг, ур чадварыг нэмэгдүүлэх ач холбогдолтойг онцоллоо.
