УИХ-ын дарга шинэ оны босгон дээр зарим гишүүнийг онц сайн ажилласан, чуулганы хуралдаан таслаагүй, Оюу толгойн хэлэлцээрт идэвхтэй оролцсон гэх мэтээр магтан өргөмжилж, шагнаж урамшуулжээ. Түүний өргөмжилснөөр “холч ухаан, хоёргүй сэтгэлээр зүтгэж, төрийн үйл хэрэгтээ ард түмний эрх ашгийг эрхэм болгож, үр бүтээлтэй ажилласан” гишүүн ердөө хоёрхон тодорчээ. Хавар, намрын чуулганы хуралдаанд тасалж, хоцролгүй оролцсон гишүүн үзээд өгье гэхнээ ганцхан байгаа аж. Тэгэхээр УИХ-ын бусад гишүүд ажлаа сайн хийгээгүй гэсэн үг. УИХ ч өөрөө муу ажиллажээ гэж дүгнэж болно. Тиймээс зүй нь бол УИХ-ын дарга захирамж гаргаж, чуулганы хуралдаанд ирц муутай, идэвхгүй оролцсон 75 гишүүндээ хариуцлага тооцох ёстой.
Нөгөө өнцгөөс харвал УИХ-ын гишүүдийг хийх ёстой ажлаа л хийснийх нь төлөө шагнаж байгаа нь утгагүй үйлдэл юм. Сав л хийвэл манлай, шилдэг шалгаруулж, цом, өргөмжлөл тараадаг өвчин манай нийгэмд газар авсан нь ийнхүү парламентад халдсан нь харамсалтай. Хоёр жилийн өмнө буюу 2020 оны тавдугаар сард УИХ-ын дарга Г.Занданшатар Монгол төрийн манлай долоон түшээ гэгчийг шалгаруулж, түүний дотор төрийн хатан эрдэнэ тодруулан түмний элэг доог, олны хэл амны бай болж байсан билээ. Иргэд олон нийт шүүмжилсээр байхад дахин ийнхүү “холч ухаан, хоёргүй сэтгэлтэй” түшээдийг шалгаруулж олны өмнө магтан матаж байгаа нь ёстой л уйдсан хүний ажил бизээ.
УИХ-ын гишүүд хууль тогтоох, төрийн бодлого боловсруулах нь тэдний хийх ёстой үүрэгт ажил нь. Ихэнх нь гишүүд нь уг ажлаа умартан цалгардуулсан учир ажлаа хийсэн цөөн хэдийг нь шагнаж сэтгэлээ зогоож байна гэж хармаар. Үнэндээ УИХ болоод гишүүд нь хэр ажиллаж байгааг УИХ-ын дарга нь биш ард түмэн л шүүдэг. Тэрхүү шүүлтүүрийн эцэст дөрвөн жилд нэг удаа улс төрийн сонгуулиар дүнгээ тавьдаг. Түүнээс биш жил бүр манлай, тэргүүн түшээд шалгаруулаад байхаар УИХ сайн ажилласан болчихгүй.
Дээр нь шагнах шалтаг олж ядсан мэт Оюу толгойн ажлын хэсэгт сайн ажилласан хэмээн хэд хэдэн гишүүнийг бас шагнажээ. Оюу толгойн төсөлд Монгол Улсын эрх ашгийг хангуулах талаар УИХ-аас гаргасан тогтоолын хэрэгжилтийг хангуулахад УИХ-ын дэргэд байгуулагдсан Түр хорооноос илүү Засгийн газрын ажлын хэсэг гол ажлыг нугалсан. Тэдний үүрэг нь ч тийм. Үр дүн нь гарангуут үүний гавьяаг УИХ өөртөө наах гэж оролдож суугаа нь ч бас л аргаа барьсан ядмагхан улс төр юм даа.
