Эдийн засаг дахь төрийн оролцоог бууруулна, төр хувийн хэвшилтэйгээ өрсөлдөх биш харин бодлогоор дэмжиж ажиллана гэдгийг Ерөнхий сайд Г.Занданшатар удаа дараа мэдэгдсэн. Төрийн өмчит компаниудын тоог цөөлж, хувьчлалыг эрчимжүүлэн, засаглалыг сайжруулж, олон нийтийн хяналттай, цомхон, чадварлаг, үр өгөөжтэй байхуйц бүтцийн өөрчлөлтийг хийж, мэргэшсэн удирдлагын тогтолцоо нэвтрүүлэх зайлшгүй шаардлагатай байгааг ч тэрбээр хэлж байв.
Өнгөрсөн хугацаанд төрийн өмчит компани, үйлдвэрийн газруудын чиг үүргийн давхардал, хийдлийг арилгаж, нэгтгэх ажлыг эхлүүлсэн. Тухайлбал долдугаар сард баруун бүсийн эрчим хүчний 9 компанийг нэгтгэн дөрөв болгосон. Засгийн газрийн өчигдрийн ээлжит бус хуралдаанаар төрийн өмчит 18 компани, үйлдвэрийн газрын хувьцааг худалдаж, нээлттэй хувьцаат компани болгохоор шийдвэрлэжээ. Энэ бол төрийн өмчит аж ахуйн нэгж, компаниудыг засаглалыг сайжруулах хамгийн оновчтой шийдэл юм. Мөн төрийн өмчит компани, үйлдвэрийн газруудын нийт тоог 18.8 хувиар буюу 19-өөр бууруулж 82 болгохоор төлөвлөөд байгаа аж.
Мэргэжлийн, хөндлөнгийн байгууллагуудын хийсэн хоёр судалгааны дүнг эш татъя. Нээлттэй нийгэм форумаас хийсэн Монгол Улсын төрөөс төсөв болон төрийн өмчит аж ахуйн нэгжүүдээр дамжуулан эдийн засагт оролцож буй оролцооны түвшинг үнэлэх харьцуулсан судалгаанд эдийн засаг, бизнес дэх төрийн оролцоо хэт өндөр, үр ашиг муутай төрийн өмчит аж ахуйн нэгжүүдийн эдийн засаг дахь байр суурь их байгааг онцолжээ. Энэ нь хувийн хэвшлийн өрсөлдөх чадвар, бүтээмж, эдийн засгийн тогтвортой өсөлтөд саад болж байгааг мөн дурдсан байна.
Монголын хөрөнгийн биржээс хийсэн судалгаанд манай ихэнх компаниуд хязгаарлагдмал хариуцлагатай компани учир банкуудын зээл, санхүүжилтийг эс тооцвол хөрөнгө оруулалт татах боломж хомс. Тиймээс томоохон компани, аж ахуйн нэгжүүд нээлттэй хувьцаат компани болж хөрөнгийн зах зээлээр дамжуулан хөрөнгө оруулах сонирхолтой байгааг дурджээ. Аливаа улс орны хөгжлийн гол хөдөлгүүр бол компани. Тэр тусмаа хувьцаагаа олон нийтэд арилжаалдаг, засаглалын хувьд нээлттэй компаниуд нийгэм, эдийн засгийн үзүүлэлтийг сайжруулж, дундаж давхаргыг тэлж байдаг.
Засгийн газар Бизнесийн эрх чөлөөний тухай хуулийн төслийг боловсруулан өргөн барихад бэлэн болсон. Эдийн засаг, дэд бүтцийн шинэтгэлийг ирэх 5 жилийн үндсэн чиглэлд тусгаж, хувийн хэвшлийг дэмжих, татварын реформ хийх замаар дундаж давхаргаа тэлэх бодлого баримталж байгаа энэ үед төрийн өмчит компани, үйлдвэрийн газруудын хувьцааг худалдаж, нээлттэй хувьцаат компани болгох гэж байгаа нь зөв, оновчтой шийдэл.
