Зуун жилийн хугацаанд гарсан хамгийн аймшигт гал түймэр гэж нэрлэж буй гал түймэр Хонконгт саяхан гарч 159 хүний аминд хүрсэнийг бид өмнө нь мэдээлсэн. Амиа алдагсдын дунд 37 настай гал сөнөөгч Хо Вай Хо байсан бөгөөд Хонконгийн Засгийн газар гал түймэртэй тэмцэж байгаад амиа алдсан гал сөнөөгчийн дурсгалыг хүндэтгэн ирэх Баасан гарагт дээд зэргийн хүндэтгэлтэйгээр оршуулах ёслол хийэ, дараа нь Галлант Гарден хнэиэх тусгай газар оршуулахаар болжээ.
Гал сөнөөгч Хо Вай Хо гал унтраах ангид есөн жил ажилласан, бие бялдрын хувьд онцгой том учир "Том Хо" хочтой нэгэн байжээ. Гал түймрийн албанд орохоосоо өмнө Нисэх онгоцны буудлын аюулгүй байдлын хэлтсийн ажилтан байсан тэрээр гал гарсны дараахан газар дээр нь ирсэн анхны гал сөнөөгчдийн нэг байсан аж. Гал гарсан өдөр тэрээр 15:30 цагийн орчимд газар дээр ажиллаж байхдаа холбоо тасарсан бөгөөд хагас цагийн дараа хамтран ажиллагсад нь түүнийг нүүрний түлэгдэлттэй ухаангүй байхыг олсон юм.
Яаралтай уушгины сэхээн амьдруулалт хийж, эмнэлэгт шилжүүлсэн ч тэрээр харамсалтайгаар нас барсан. Гэхдээ хамгийн харамсмаар түүх нь түүний, хийж амжаагүй хурим нь гэж хэлж болно. Тэрээр энэ арванхоёрдугаар сард арав гаруй жил хамт амьдарсан найз охинтойгоо гэрлэхээр төлөвлөсөн байжээ. Гэвч тэрээр олон жил хүлээсэн хуримаасаа өмнө ийнхүү харамсалтайгаар одсон байна. Түүний сүйт бүсгүй сошл хаягтаа "Миний супер баатар даалгавраа биелүүлж, Криптон руу буцаж ирлээ. Чи бол миний бахархал... Би үнэхээр, үнэхээр чиний гарыг дахин атгахыг хүсэж байна" гэж тэр бичээд, болсон явдлыг "хүлээн зөвшөөрч чадахгүй" байгаагаа, мөн олон нийтийн сүлжээнээс "түр завсарлага авах" болсноо нэмж онцолжээ.
Уг эмгэнэлтэй галын аюул шатамхай, шаардлага хангаагүй барилгын материалаас болж гарсан бөгөөд Барилгын компанийн гурван албан тушаалтныг шатамхай хөөсөн хавтан зэрэг аюулгүй бус материал ашигласан хэргээр хүн амины хэрэгт сэжиглэн баривчилсан юм.
