Сүүлийн өдрүүдэд Өмнөд Солонгост Камбожтой холбоотой мэдээллүүд онцлох сэдэв болоод байна. Тодруулбал, 22 настай Пак Мин У гэх Солонгос их сургуулийн оюутан Камбож яваад амиа алджээ. Тэрээр 2025 оны 7-р сарын 17‑нд Камбож руу явна гэж гэр бүлдээ хэлсэн бөгөөд яваад удаагүй байхад нь гэр бүл рүү нь хүн утсаар залгаж, “Пак та энд асуудал үүсгэж, баригдсан, гаргах бол 5,000 вон илгээ” гэж шаардсан байна.
Ингээд удалгүй Пак Мин У-ын цогцос 2025 оны 8‑р сарын 8‑нд тус улсын Кампот мужаас олджээ.
Нас барсан залуугийн бие олон тооны шарх сорви, хүнд гэмтэлтэй байсан ба зүрхний доголдлоор нас барсан гэсэн дүгнэлт гарсан байна. Энэ хэргээс хойш БНСУ-ын олон нийтийн сүлжээ, хэвлэл мэдээллийн хэрэгслээр олон иргэн “Камбожид өндөр цалинтай ажил байна” гэх хуурамч зарын дагуу Камбож руу явж удалгүй хүчээр хөдөлмөр эрхэлсэн, хамтаан садан нь сураггүй алга болсон, эсвэл холбоо тасарсан мөн амь насанд нь хүрсэн гэх мэдээллүүдийг цацаж эхэллээ. Гэрчүүд болон амьд үлдсэн хүмүүсийн ярьснаар, олон солонгос хохирогч замын болон бусад зардлыг хариуцна, орчуулга, мэдээлэл оруулах, олон нийтийн мэдээллийн хэрэгсэл удирдах өндөр цалинтай ажилд оруулна гэсэн онлайн зар сурталчилгаанд уруу татагдсан байна. Камбожид очсоны дараа тэд дарамт шахалтад орж, онлайн луйвар эсвэл дээрэмдэх схемд оролцохоос өөр аргагүйд хүрсэнээ бичсэн байв.
Тус улсын Үндэсний аюулгүй байдлын зөвлөх Ви Сон Лак, Камбожид 1000 орчим солонгосчууд зохион байгуулалттай гэмт хэргийн бүлэглэлд холбогдсон, үүнээс хэд нь хохирогч, хэд нь сайн дураараа оролцсон нь тодорхойгүй байна гэж өчигдөр мэдээлэв. Камбож дахь онлайн луйврын салбар янз бүрийн үндэстний 200,000 орчим хүнийг урхидаж ажиллуулдаг . Эдгээрээс хэд нь солонгосчууд байгааг нарийн мэдэхгүй ч манай холбогдох албаныхан үүнийг 1,000 орчим хүн гэж тооцоолж байна" гэж Ви хэвлэлийн бага хурлын үеэр хэллээ.
Солонгосын аяллын компаниуд Камбожийн зарим газрууд руу явахгүй байх, явсан ч маш болгоомжой байхыг сануулж, анхааруулга гаргасан байна.
БНСУ-ын Засгийн газраас өчигдөр уг хэргүүдийг нэн яаралтай шалгах үүрэг өгч, гадаад яам, цагдаа, тусгай албаны хамтарсан багийг Камбож руу илгээх, Камбожийн талтай иргэдийг буцаах хэлэлцээр хийх, гэмт хэргийн сүлжээг мөрдөн шалгах, гадаадад байгаа Солонгос иргэдийн аюулгүй байдлыг хамгаалах арга хэмжээг авч эхэлжээ.
Ерөнхийлөгч Ли Жэ Мён “Гадаадад байгаа иргэдийн амь насыг хамгаалахын тулд бүх боломжит арга хэмжээг авах ёстой” гэж мэдэгдсэн байна.
Камбожийн эрх баригчид онлайн залилангийн энэ хэрэгтэй холбоотойгоор ажиллагаа явуулж Өмнөд Солонгосын 60 орчим иргэнийг саатуулсан бол, 80 иргэнийг олоогүй байгаагаа мэдэгдлээ.
Энэ хэрэг нь Солонгос даяар олон нийтийн анхаарлыг татаж, хуурамч гадаад ажлын зараар явсан иргэдийнхээ хойноос гэр бүл нь санаа зовж, иргэд засгийн газрын түвшинд асуудлыг хэрхэн шийдэхийг хүлээсэн байдалтай байна.
