УИХ-ын гишүүн, Сангийн сайд Б.Жавхлан цаг үеийн асуудлаар мэдээлэл хийлээ. Тэрбээр, Төрийн сангийн үйл ажиллагаа хэвийн явж байна. Өнгөрсөн долоодугаар сард төсөвт тодотгол хийсэн. Батлагдсан төсөв хуваарийнхаа дагуу Монголын төрийн бүх санхүүжилт хэвийн явж байгаа гэдгийг албан ёсоор хэлье. Хаана ч, ямар ч байдлаар саатсан зүйл байхгүй. Энэ жилийн хувьд төсвийн хөрөнгө оруулалтын гүйцэтгэл 50 гаруй хувьтай байна. Гуравдугаар улиралд олон жилийнхээ дунджаар энэ орчимд байдаг. Монголбанк болон Үндэсний статистикийн хорооноос сүүлийн үеийн тоонуудыг авлаа. Монголбанкны албан ёсны вэб сайтад гуравдугаар улирлын буюу есдүгээр сарын 30-ны байдлаар Монгол Улсын валютын нөөц 5 тэрбум 874 сая ам.доллар байна. Өөрөөр хэлбэл, 4-5 сарын импортын хэрэгцээг хангах хэмжээний үлдэгдэлтэй байна.
Жилдээ хоёр удаа ОУВС-гаас улс орнууд дээр очиж ажилладаг. Өнгөрсөн долоо хоногт ОУВС-ийн баг Монголд ирээд явлаа. Энэ багийн дүгнэлтээр ямар нэгэн эрсдэлтэй гэсэн дүгнэлт гарсан зүйлгүй, төлбөр тооцоо, гадаад зээлийн өр төлбөртэй холбоотой ямар ч эрсдэл байхгүй. Ирэх долоо хоногт би ОУВС-ийн намрынхаа хуралд явна. П.Сайнзориг гишүүнийг цуг яваасай. Монгол Улсыг олон улсад яаж дүгнэж байна вэ гэдгийг өөрөө харах хэрэгтэй. Улс орнуудын зээлжих зэрэглэлийг үнэлдэг гурван том компани бий. Түүний нэг болох Fitch агентлагаас Монгол Улсын зээлжих зэрэглэлийг +B буюу тогтвортой гэж өнгөрсөн жил үнэлсэн. Дараагийн хоёр агентлагууд нь ажлаа хийж байна. Ирэх арав, арваннэгдүгээр сард дүнгүүд нь гарна. Гадаад нөхцөл ойлгомжгүй, тогтворгүй байна. Хятадын зээлжих зэрэглэл нэг оноогоор буурсан. Монгол Улс БНХАУ-тай эдийн засгийн өндөр хамааралтай боловч зээлжих зэрэглэлээ хэвээр хадгалж үлдлээ. АНУ-ын зээлжих зэрэглэл мөн унасан. Манайтай ижил төстэй жижиг эдийн засагтай улсуудын зээлжих зэрэглэлүүд унасан. Харин манайх тогтвортой байж чадсан.
Төрийн сангийн үйл ажиллагаа, ОУВС-гаас гарч байгаа дүгнэлтүүд, Монгол Улсын валютын нөөц зэрэг эдгээр асуудлууд дээр хэн дуртай нь гарч ирээд улс төржүүлээд, цээжнийхээ бангаар ярьж, хэлж болохгүй. Энэ бол маш эмзэг асуудал шүү. Тийм учраас өнөөдрийн хэмжээнд хүрсэн эдийн засгийн нөхцөл байдлаа цаашид хэрхэн яаж хадгалах вэ гэдэг нь бидний хамгийн том, чухал зорилт болж байна. Монгол Улсын Засгийн газраас ирэх оны төсвөө есдүгээр сарын 1-нд УИХ-д өргөн барьдаг. Энэ жил ч мөн хугацаандаа өргөн барьсан боловч харамсалтай нь, хэлэлцэхгүй байна. Аравдугаар сарын эхний 7 хоногт бид төсвөө хэдийнн хэлэлцээд эхэлчихсэн, ажлын хэсэг нь байгуулагдчихсан явж байдаг. Энэ 7 хоногт төсвийн хоёр дахь хэлэлцүүлэг үргэлжилж ажлын хэсэг нь байгуулагдаад, ажилдаа ороосой гэж хүсэж, уриалж байна. Улсын төсөв гэдэг бол эдийн засгийн толь нь байдаг.
Ирэх жилийн төсөв хэрхэн, яаж батлагдахаас ирэх жилийн бүтээн байгуулалтын ажлууд, эдийн засгийн бүх оролцогч нар, гадаад дотоодын хөрөнгө оруулагч нар төлөвлөгөөгөө гаргана. Өнөөдөр 10 сар гарчихаад байхад төсвийнхөө хоёрдугаар хэлэлцүүлгийг хийж амжаагүй байна гэдэг бол энэ жилийн төсвийн цагалбарын хувьд маш их эрсдэлтэй болж байна. Арваннэгдүгээр сарын 15 төсвөө баталчихсан байх учиртай. Санал, шүүмжлэл байгаа бол түүнийгээ нээлттэй хэлэлцээд, ажлын хэсгээ байгуулаад явах нь л чухал. Ажлаа хийе. Энэ жилийн төсвий хувьд аль болох эдийн засгийн өсөлтөө, макро тогтвортой байдлаа хадгалах нь хамгийн чухал байна. Эдийн засгийн өсөлтийг хувийн сектороор дамжуулж хадгалах шаардлагатай. Хувийн сектортоо эдийн засгийн орон зайг нь аль болох гаргаж өгөхийн тулд ирэх оны төсвөө өргөн барьсан. Тийм учраас ирэх жилийн төсвийн хувьд хувийн хэвшил дээр суурилсан, эдийн засгийнхаа өсөлтийг дэмжих ийм төсөв болсон гэдгийг Ерөнхий сайд Г.Занданшатар онцлоод байгаа юм гэлээ.
