Олон улсын жүдогийн холбооноос зохион байгуулдаг Чиндаогийн Гран при өндөрлөлөө. Тус тэмцээнд таван тивийн 26 орны 200 тамирчин өрсөлдөв. Монгол Улсаа төлөөлөн 15 жүдоч барилдаж, хоёр алт, нэг мөнгө, гурван хүрэл медаль хүртсэн амжилтаараа багийн дүнгээр Японы араас хоёрдугаар байрт жагслаа. Медаль авсан тамирчдыг танилцуулбал, тэмцээний эхний өдөр эрэгтэйчүүдийн 66 кг-ын жинд гавьяат тамирчин Ё.Басхүү алтан медаль, 60 кг-ын жинд Б.Сүхбат, 48 кг-д Г.Наранцэцэг, 57 кг-д Л.Сосорбарам нар хүрэл медаль хүртсэн.
Харин хоёр дахь өдөр Л.Энхрийлэн мөнгөн медаль хүртсэн юм. Тэрбээр алтан медалийн төлөө Франц улсын тамирчин Монан Декетертэй барилдаж, өрсөлдөгчөө буулгаж авсан. Тэмцээний сүүлийн өдөр буюу өчигдөр +100 кг-д өрсөлдсөн Б.Гончигсүрэн алтан медаль хүртлээ. Түүний хувьд Словак улсын тамирчин Мариус Физертэй барилдаж үндсэн цагт мордох мэхээр вазари үнэлгээ аван улмаар даралтаар цэвэр ялж, аварга болсон юм.
