Улаанбаатар хотын Ус сувгийн удирдах газар (УСУГ)-ын удирдлагын баг Усны Компакт – Улаанбаатар хотын нийт ус хангамжийг нэмэгдүүлэх хөтөлбөрийн хүрээнд хэрэгжиж буй төслүүдийн явц, тэр дундаа Шинэ Төв цэвэрлэх байгууламжийн баруун талд баригдаж буй Хаягдал ус дахин боловсруулах үйлдвэрийн бүтээн байгуулалт, тоног төхөөрөмжийн угсралт, суурилуулалтын ажилтай өнөөдөр танилцлаа.
Хаягдал ус дахин боловсруулах үйлдвэрийн бүтээн байгуулалт 92.55%-тай үргэлжилж байгаа бөгөөд шинэ Төв цэвэрлэх байгууламжаас анхны усаа хүлээн авах, туршилт тохируулга эхлүүлэхэд бэлэн болжээ.
Хаягдал ус дахин боловсруулах үйлдвэр ашиглалтад орсноор эрчим хүчний үйлдвэрлэлд анх удаа дахин боловсруулсан ус ашиглах юм байна. Ингэснээр жил бүр ДЦС-3, 4-д одоо хэрэглэж буй 18 сая м³ хүртэлх гүний усыг хэмнэнэ гэсэн таатай мэдээ байна.
