Механик болон органик бохирдлын агууламж хэт өндөр бохирдолтой ус нь цэвэрлэх байгууламжийн хэвийн үйл ажиллагаанд хүндрэлтэй нөхцөл байдлыг бий болгож байгаа талаар мэргэжилтнүүд үргэлж сануулдаг. Өөрөөр хэлбэл, иргэдийн суултуураа хогийн сав мэт ашигладаг дадал, стандартад нийцэхгүй бохирдол хэт өндөртэй ус Төв цэвэрлэх байгууламжид нийлүүлдэг ААН-үүдээс болж асуудал үүссээр ирсэн.
Хамгийн гол нь хэлж сануулаад ч дээрддэггүй энэ нөхцөл байдал шинэ төв цэвэрлэх байгууламжийн үйл ажиллагаанд том эрсдэл дагуулна гэж мэргэжилтнүүд сануулж байна. Улаанбаатар хот удахгүй хоногт 250.000 м3 ус хүлээн авах хүчин чадал бүхий шинэ цэвэрлэх байгууламжийг хүлээн авахаар УСУГ-аас энэ оны 7 дугаар сараас эхлэн туршилт тохируулгын ажлыг эхлүүлээд байгаа. Гэсэн ч үйлдвэрийн хог хаягдал бүхий бохир усыг хүлээн авсан хэвээр байвал нөхцөл байдал сайжрах боломжгүй байхаар дүр зураг харагдаж байгаа аж. Учир нь шинэ цэвэрлэх байгууламжийн насос тоноглолын хувьд сүүлийн үеийн дэвшилтэд технологиор хийгдсэн тул хог хаягдал орсон нөхцөлд задлах боломжгүй битүүмж бүхий угсралттай. Өөрөөр хэлбэл, шинэ Төв цэвэрлэх байгууламж шууд тэг зогсолт хийх хүндрэл үүсэх эрсдэлтэй ажээ.
Иймээс нийслэлд үйлдвэрлэл эрхлэгч бүхий л ААН-үүд цаашид өөрсдийн цэвэрлэх байгууламжийг суурилуулж Монгол Улсад мөрдөгдөж байгаа МNS : 6561:2024 стандартад нийцүүлэн бохир усаа нийлүүлэх үүргээ биелүүлэх хэрэгтэй байна.
