Ардчилсан намын даргын сонгуульд өрсөлдөхөөр УИХ-ын дэд дарга Б.Пүрэвдорж өнөөдөр нэр дэвших хүсэлтээ Үндэсний бодлогын хорооны дотоод сонгуулийн хороонд гардуулж, мэдээлэл хийлээ. Тэрбээр нэр дэвших болсон шалтгаанаа ийн тайлбарлав.
-АН-д 1992 онд элсэж, батлахаа авч, сумандаа ухуулагч хийж эхэлснээс хойш намынхаа төлөө зүтгэх сайхан боломж ирсэн. Улс төрд идэвхтэй оролцох үе 2009-2010 он буюу Ховд аймгийн АН-ын даргаар ажиллаж, анх аймагтаа ялалт байгуулах үүдийг нээсэн. 2012-2015 онд Гадаадын иргэн, харьяатын асуудал эрхлэх газар, Иргэний харьяа шилжилт хөдөлгөөний газрын даргаар ажиллаж, монголчууд сайхан амьдрах боломжийн төлөө ажиллаж байлаа. 2016 оны УИХ-ын сонгуулиас хойш гурван сонгуульд дараалан ялж ард түмнийхээ хэлж дамжуулсан захиасыг Монгол төрийн бодлого болгохоор ажиллаж ирлээ. Эрх баригчдын аливаа нэгэн буруу шийдвэртэй байнга тэмцэж ирсэн. Би АН-ын дарга болбол гурван зүйлд анхаарч ажиллана.
Нэгдүгээрт, чөлөөт зах зээлийг шинэ шатанд гаргаж, аж ахуй нэгжүүд баруун төвийн үзэл баримтлалаар ажиллах тэр боломжийг бий болгоно. Монгол Улсын эдийн засагт төрийн оролцоо хэтэрхий их болсон. Эдийн засгийн 40 хувь төсвөөр дамжиж, 30 хувь төрийн өмчит компаниар, 10 хувь дарга нарын голцуу төсвийн хөрөнгө оруулалтаар ажил хийдэг 5000 компанийн эдийн засаг буюу Монголын нийт эдийн засгийн 75 хувь төсөв, төрийн өмчит компани, дарга нарын компанитай холбоотой байна.
Хоёрдугаарт, хариуцлага. МАН есөн жилийн турш үнэмлэхүй олонхоор засаглахдаа ард иргэдэд ирэх байсан боломжийг бүгдийг хулгайлсан он жилүүд боллоо. Төсвийн хулгай, ЖДҮХС-ийн, нүүрсний, ковидын гээд маш олон хулгай хийсэн. Энэ бүхэн дээр хариуцлага тооцож байгаа зүйл алга. Нүүрсний үнэ нэг тонн нь 400 ам.долларт хүрсэн гайхалтай үед эдийн засагт асар их орлого орж ирэх боломжийг яаж хулгайлж алга болгосныг та бүхэн мэдэж байгаа. АН 2028 онд ялалт байгуулснаар төрийн нэрээр хулгай хийсэн хулгайч нарт хатуу хариуцлага тооцох болно. Хулгайлсан мөнгө мөртэй, тийм учраас хариуцлага тооцож ажиллана.
Гуравт, цаашдаа бидний хийх ёстой зүйл бол баруун төвийн үзэл буюу чөлөөт зах зээл, чөлөөт ардчилал, үг хэлэх эрх чөлөө, хэвлэн нийтлэх эрх чөлөө, эдийн засгийн эрх чөлөөг авч ирэхийн төлөө Ардчилсан намыг ялуулахын төлөө, ард иргэдийн амьдрал, аж ахуй нэгжийн эдийн засгийн чадавхийг илүү өндөр төвшинд хүргэхийн төлөө намынхаа гишүүд болоод ард түмэнтэйгээ хамтарч ажиллах болно.
