Арваас доошгүй жил мал малласан малчны нэг хүүхдийг төрийн өмчийн их сургуульд үнэ төлбөргүй сургах заалт ирэх есдүгээр сарын 1-ний өдрөөс эхлэн хэрэгжинэ. УИХ-аас баталсан Малчны тухай хуулийн 4.2.5-т “10-аас доошгүй жил тасралтгүй малчнаар ажилласан малчны нэг хүүхдийг мал аж ахуй, бэлчээр, тэжээлийн чиглэлээр үнэ төлбөргүй сургана” гэж заасан юм. Энэхүү хуулийн зохицуулалт ирэх сараас хэрэгжих бөгөөд улсын хэмжээнд хэчнээн малчны хүүхэд их сургуульд үнэ төлбөргүй суралцах вэ гэдэг судалгааг эцэслэн гаргах юм байна.
Санхүүжилтийн эх үүсвэрийг Боловсролын зээлийн санд тусгаж өгсөн тул асуудал үүсэхгүй юм байна. Хуулийн зохицуулалттай холбоотойгоор Хөдөө аж ахуйн их сургуульд малчны хүүхэд үнэ төлбөргүй суралцана. УИХ-ын гишүүдийг тойрогтоо ажиллах үед малчдаас тавьж ирсэн төрийн өмчийн их сургуульд хүүхдээ үнэ төлбөргүй сургах амлалт хэрэгжихгүй байгаа тухай гомдол багагүй гардаг тул УИХ ийн хуульчилжээ.
