“People” сэтгүүлээс эх орон, ард түмэндээ онцгой гавьяа байгуулж, нийгмийн хөгжилд бодит хувь нэмэр оруулсан хувь хүн, байгууллагыг тодруулж “People awards” шагналыг хүртээдэг уламжлалтай бөгөөд 2025 оны “Хүний эрхийн төлөө онцлох хүн”-ээр Хүний эрхийн Үндэсний Комиссын гишүүн Ж.Хунанг тодрууллаа.
ХЭҮК-ын гишүүн, хуульч, судлаач Ж.Хунан, Хүний эрхийн Үндэсний Комиссын дарга, Ази-Номхон далайн бүс нутгийн хүний эрхийн үндэсний байгууллагуудын Чуулган (АНДЧ)-ы орлогч дарга, Ази-Номхон далайн бүсийн Хуульчдын холбооны гүйцэтгэх хорооны гишүүн, Монголын Хуульчдын холбооны ерөнхийлөгч, Нээлттэй нийгэм форумын Эрх зүйн чадавхыг дээшлүүлэх нь төслийн зөвлөх, НҮБ-ын Хөгжлийн хөтөлбөрийн “Эрх зүйн чадавхыг нэмэгдүүлэх замаар ядуурлыг бууруулах нь”, “Хууль зүйн үйлчилгээний хүртээмж ба хүний эрх” төслийн зохицуулагч, Хүний эрхийг хангах үндэсний хөтөлбөрийн ажлын албанд мэргэжилтэн зэрэг албыг хашиж, хууль, хүний эрхийн чиглэлээр 20 гаруй жил ажиллаж байгаа юм.
Тэрбээр, Монгол Улсад төлбөрийн чадваргүй иргэнд хууль зүйн туслалцаа үзүүлэх үндэсний тогтолцоог үүсгэн байгуулж бэхжүүлэх, Монгол Улсын хүний эрхийн үндэсний хөтөлбөрийг хэрэгжүүлэх, гэмт хэргийн гэрч хохирогчийг хамгаалах эрх зүйн орчныг бүрдүүлэх, хөгжлийн бэрхшээлтэй иргэдийн эрх ашгийг хамгаалах, Бүх нийтийн эрх зүйн боловсролыг дээшлүүлэх үндэсний хөтөлбөрийн цахим эрх хөтчийн тогтолцоог байгуулах зэрэг ажилд манлайлан оролцсон.
Мөн иргэдэд хууль зүйн зөвлөгөө, туслалцааг үнэ төлбөргүй үзүүлэх зорилгоор “Хуульчдын про-боно өдөр” арга хэмжээг санаачлан эхлүүлж, Хүний эрхийг хангах үндэсний II хөтөлбөр, хүний эрхийн үндэсний индекс боловсруулах, хүүхдийн эрхийг хамгаалах тэр дундаа хүүхдийн эрхийн хууль зүйн хороо, сургуулийн дотуур байр, хагас, бүтэн өнчин, байнгын асаргаа шаардлагатай болон бэлгийн хүчирхийллийн хохирогч хүүхдийн эрхийн асуудлыг тусгайлан хөндөж, хүүхдийн хөгжил, хамгааллын асуудлыг үндэсний аюулгүй байдлын үзэл баримтлалд тусгуулах асуудлыг дэвшүүлэн ажиллаж байна.
